ព័ត៌មាន​ថ្មី
សូម​ស្វាគមន៍​ ឯកឧត្តម លោកជំទាវ លោក លោកស្រី​ ចូលមកកាន់គេហទំព័រ «ភ្នំពេញថ្មី»​

រដ្ឋមន្ត្រី​កសិកម្ម​នាំយក​កូនឈើ​ហូប​ផ្លែ​ពូជ​មាន់​និង​ចំណី​មក​ចែកជូន​ពលរដ្ឋ​ចំនួន​២០០​គ្រួសារ នៅ​ស្រុក​តា​តា​លោសែន​ជ័យ​

​ខេត្តពោធិ៍សាត់ ៖ លោក វេ​ង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និង​នេសាទ និង​លោក ម​ម៉ៅ ធនិន អភិបាល​នៃ​គណ​អភិបាលខេត្ត​ពោធិ៍សាត់ រួមជាមួយ​ប្រតិភូ​មួយក្រុម​កាលពី​ថ្ងៃទី​៧ ខែសីហា ឆ្នាំ​២០២០​នេះ បាន​អញ្ជើញ​មកជួប​សំណេះសំណាល​ជាមួយ​ប្រជាពលរដ្ឋ និង​នាំយក​កូនឈើ​ហូប​ផ្លែ (​ដូង ខ្មុ​រ មាន ឫស្សី ស្វាយ ត្របែក និង​ស្តៅ​) ពូជ​មាន់ និង​ចំណី​មាន់មក​ចែកជូន​ប្រជាពលរដ្ឋ​ចំនួន ២០០​គ្រួសារ​សម្រាប់​អនុវត្តន៍​ប្រព័ន្ធ​កសិកម្ម​ចំរុះ ដែល​ពិធី​នេះ​បានរៀបចំ​ធ្វើ​នៅផ្ទះ​កសិករ ហាច ហៀ​ត នៅ​ភូមិ​ផ្ទុះ​រុង ឃុំ​ផ្ទះ​រុង ស្រុក​តា​លោ សែន​ជ័យ ខេត្តពោធិ៍សាត់​។

​លោក ង៉ោ ប៉ុន​ថា​ន សាកលវិទ្យាធិការ​នៃ​សាកលវិទ្យាល័យ​ភូមិន្ទ​កសិកម្ម (RUA) បាន​រាយការណ៍​ដោយ​សង្ខេប​អំពី​គម្រោង​ដែលមាន​ខ្លឹមសារ​ដូចតទៅ​៖ គម្រោង​ស្តីពី “​ការពង្រីក​បច្ចេក ទេស​កសិកម្ម​ដែល​ធន់​នឹង​អាកាសធាតុ ហៅ​កាត់​ថា SUCRA” គឺជា​អនុ​សមាសភាគ ៣.២ នៃ​កម្មវិធី​ផ្សព្វផ្សាយ​បច្ចេកទេស​កសិកម្ម​ថ្មី​ដែល​ធន់​ទៅនឹង​ការប្រែប្រួល​អាកាសធាតុ (ASPIRE) ដែល​គាំទ្រ​ថវិកា​ដោយ​មូលនិធិ​អន្តរជាតិ​សម្រាប់​អភិវឌ្ឍ​កសិកម្ម (IFAD) និង​រាជរដ្ឋាភិបាល​កម្ពុជា​។

​លោក​ថា គម្រោង​នេះ​សហការ​អនុវត្ត​ជាមួយ​វិទ្យាស្ថាន​អន្តរជាតិ​ស្តារ​ជនបទ​ឡើងវិញ (IIRR) ដែលជា​ដៃគូ​ប្រតិបត្តិ​នៅ​មូលដ្ឋាន មន្ទីរ​កសិកម្ម រុក្ខា ប្រមាញ់ និង​នេសាទ ខេត្តពោធិ៍សាត់ និង​ខេត្តកំពង់ឆ្នាំង និង​មជ្ឈមណ្ឌល​សម្រាប់​ការអភិវឌ្ឍ​និង​បរិស្ថាន​នៃ​សាកលវិទ្យាល័យ​ប៊ើ​ន​ប្រទេស​ស្វី​ស​។

​លោក​បញ្ជាក់​បន្ថែមថា គម្រោង SUCRA មាន​គោលបំណង​- បង្កើន​ភាព​ធន់​ទៅនឹង​ការ​ប្រែ ប្រួល​អាកាសធាតុ ដល់​កសិករ​ខ្នាតតូច​ដែល​ងាយ​រងគ្រោះ តាមរយៈ​ការជំរុញឱ្យ​កសិករ​អនុវត្ត​គំរូ​ល្អៗ​នៃ​ប្រព័ន្ធ​កសិកម្ម​ចំរុះ – ធ្វើ​ឲ្យ​ប្រសើរឡើង​នូវ​សន្ដិសុខ​ស្បៀង និង​អាហារូបត្ថម្ភ – បង្កើន​ប្រាក់ចំណូល និង​ពង្រឹង​មុខងារ​ប្រព័ន្ធ​អេកូឡូស៊ី​ដី – លើកកម្ពស់​ចំណេះដឹង​អំពី​ហានិភ័យ​នៃ​ការប្រែប្រួល​អាកាស ធាតុ និង​អំពី​មធ្យោបាយ​ដែល​ធ្វើ​ឲ្យ សម្រេចបាន​ភាព​ធន់​ប្រកបដោយ​ចីរភាព​។
​គម្រោង​អនុវត្ត​ក្នុងភូមិ​គោលដៅ​ចំនួន ២៣ នៅក្នុង​ខេត្តពោធិ៍សាត់ និង​ខេត្តកំពង់ឆ្នាំង និង​មាន​ប្រជាកសិករ​ទទួលផល​ផ្ទាល់​ពី​គម្រោង​សរុប​ចំនួន ១៥០០​គ្រួសារ​។ ដោយ​ទ្បែ​ក​សម្រាប់​ខេត្តពោធិ៍សាត់ មាន​ភូមិ​គោលដៅ​ចំនួន​១១ នៅក្នុង​ឃុំ​ផ្ទុះ​រុង និង​ឃុំ​តា​លោ ស្រុក​តា​លោ​សែន​ជ័យ និង​មាន​កសិករ​គោលដៅ​សរុប​ចំនួន ៧៥០​គ្រួសារ​។

​លោក ម៉ៅ ធនិន អភិបាលខេត្ត​ពោធិ៍សាត់​បានបង្ហាញ​នូវ​ចំណាប់អារម្មណ៍​យ៉ាង​យកចិត្តទុកដាក់ និង​វាយតម្លៃ​ខ្ពស់​លើ​លទ្ធផល​នៃ​ការអនុវត្ត​គម្រោង ដូច​អ្វីដែល​ឯកឧត្តម​សាកលវិទ្យាធិការ​បាន​រាយ​ការណ៍​ជូនជ្រាប​ខាងលើ​។ លោក​ក៏បាន​ជម្រាបជូន​ពិធី​អំពី​សក្តានុពល​វិស័យ​កសិកម្ម​នៅ​មូលដ្ឋាន​របស់លោក​ផងដែរ ដោយ​មានការ​វិវឌ្ឍន៍​រីកចម្រើន​គួរ​ជាទី​មោទន បើទោះបី​ស្ថានភាព​សេដ្ឋកិច្ច​ជារួម​កំពុង​ជួប​បញ្ហា​ដោយសារ​ជំងឺឆ្លង​កូ​វីដ​-១៩​។

​លោក​អភិបាលខេត្ត​បានផ្តល់​ការគាំទ្រ​ពេញទំហឹង​ចំពោះ​រាល់​សកម្មភាព​ដែល​ជួយ ឧបត្ថម្ភ គាំទ្រ និង​ជំរុញ​ដល់​ការអភិវឌ្ឍ​វិស័យ​កសិកម្ម​នៅក្នុង​មូលដ្ឋាន​របស់លោក​តាម​គ្រប់​រូបភាព ធ្វើយ៉ាងណា​ចូលរួម​បង្កើត​ការងារ បង្កើន​ប្រាក់ចំណូល ធានាបាន​នូវ​សន្តិសុខ​ស្បៀង​ក្នុង​គ្រួសារ និង​ឈាន​ជា​ជំហានៗ​ទៅធ្វើ​ការនាំចេញ​នាពេល​អនាគត​។

​លោក វេ​ង សាខុន បាន​ពាំ​នាំនូវ​ការ​ផ្តាំផ្ញើ​សាកសួរ​សុខទុក្ខ​ពីស​ម្តេច​តេ​ជោ ហ៊ុន សែន នាយករដ្ឋមន្ត្រី សម្តេច​កិត្តិ​ព្រឹ​ត្ត​បណ្ឌិត សម្តេច​មហា​ពញា​ចក្រី​ប្រធានរដ្ឋសភា និង​សម្តេច​វិបុល​សេនា​ភក្តី​ប្រធានព្រឹទ្ធសភា មក​ជូន​បងប្អូន​ខេត្តពោធិ៍សាត់ ពិសេស​បងប្អូន​ក្នុងស្រុក​តា​លោ​សែន​ជ័យ​ដែល​កំពុង​ញាប់ដៃ ញាប់ជើង​ក្នុង​ការខិតខំ​ប្រឹងប្រែង​លើ​ការងារ​បង្កបង្កើនផល ហើយ​សម្តេច​បាន​ជូនពរ​ឱ្យ​បងប្អូន​ប្រជាពលរដ្ឋ​គ្រប់ៗ​ក្រុមគ្រួសារ​ឲ្យ​ជួបតែ​សេចក្តីសុខ សេចក្តីចម្រើន សុភមង្គល​ក្នុង​ក្រុមគ្រួសារ និង​មាន​សុខភាព​ល្អ ឆ្លង​ឲ្យ​ផុតពី​វិបត្តិ​ជំងឺឆ្លង​កូ​វីដ​-១៩​។

​លោក​រដ្ឋមន្ត្រី​បាន​ថ្លែង​ការកោតសរសើរ និង​វាយតម្លៃ​ខ្ពស់​ចំពោះ​សមិទ្ធផល​សំខាន់​ដែល​គម្រោង​សម្រេចបាន ជាក់ស្តែង​ក្រៅពី​ការបណ្តុះបណ្តាល​ចំណេះដឹង​ទាក់ទង​ការចិញ្ចឹម និង​ដាំ​ដុះ​ដូច​បាន​រៀបរាប់​ជូន​ដោយ​លោក​សាកលវិទ្យាធិការ គម្រោង​បាននិងកំពុង​ផ្តល់​ធាតុ​ចូល​មួយចំនួន ដល់​កសិករ​គោលដៅ​ចំនួន ៧៥០​គ្រួសារ ក្នុង​ខេត្តពោធិ៍សាត់ ដើម្បី​ចាប់ផ្តើម​អនុវត្ត​ប្រព័ន្ធ​កសិកម្ម​ចម្រុះ ដែល​រួមមាន​៖ កូនឈើ​ហូប​ផ្លែ សរុប​ចំនួន ២១ ៧១៥​ដើម មាន់ពូជ និង​ទា សរុប​ចំនួន​១ ១៧០​ក្បាល កូន​ត្រី និង​កូន​កង្កែប​សរុប​ចំនួន ៨៥ ៩១៣​ក្បាល ចំណី​មាន់​ចំនួន ៣៧​បាវ ចំណី​ត្រី​ចំនួន ៥០​បាវ និង​ជីធម្មជាតិ​ចំនួន ៤២​បាវ​។​

​លោក វេ​ង សាខុន បានផ្តល់​ក្តីសង្ឃឹម និង​ការជឿជាក់​យ៉ាង​មុតមាំ​ដល់​ប្រជា ពលរដ្ឋ​ថា​ក្រោម​ការដឹកនាំ​ប្រកបដោយ​គតិបណ្ឌិត និង​ឈ្លា​វៃ​បំផុត​របស់​សម្តេច​តេ​ជោ​ហ៊ុន សែន​”​មិន​ទុក​ឲ្យ​ប្រជាពលរដ្ឋ​ណា​ម្នាក់​ស្លាប់​ដោយ​ខ្វះ​ស្បៀង​បានឡើយ​” ។ ដូច្នេះហើយ ក្នុងនាម​ឲ្យ​ថ្នាក់ដឹកនាំ​ក្រសួង និង​អភិបាលខេត្ត​បាន​ខិតខំ​ប្រឹងប្រែង​យក​អស់​កំលាំងកាយ​ចិត្ត ប្រាជ្ញា​ស្មារតី ដោយបាន​ដាក់ចេញ​នូវ​វិធានការ​ចំ​បាច់​សំខាន់ៗ​មួយចំនួន​ចំពោះមុខ​ដើម្បី​ចូលរួម​ថែរក្សា​ការពារ និង​ទ្រទ្រង់​សេដ្ឋកិច្ច​គ្រួសារ​ឲ្យ​មាន​ចីរភាព និង​និរន្តរភាព រក្សា​សុវត្ថិភាព​ស្បៀង​ក្នុង​គ្រួសារ តាមរយ​:​ការបង្កើន​ផលិតភាព​ផលិតកម្ម​កសិកម្ម ប្រែក្លាយ​វិបត្តិ ទៅជា​ឱកាស​ដើម្បី​ពង្រីក និង​ពង្រឹងសមត្ថភាព​ផលិត និង​ចិញ្ចឹម​តាម​គ្រប់​រូបភាព​។ សកម្មភាព​ទាំងអស់នេះ ទទួលបាន​ការគាំទ្រ​ទាំង​កំលាំងចិត្ត ស្មារតី និង​ជាពិសេស​ថវិកា​ដោយផ្ទាល់​ពីស​ម្តេច​តេ​ជោ ហ៊ុន សែន ចំនួន ២០០០ លាន​រៀល សម្រាប់​ពង្រីក​វិស័យ​វា​រីរ​ប្បក​ម្ម​។

​លោក​រដ្ឋមន្ត្រី​ក៏បាន​ថ្លែងអំណរគុណ​យ៉ាង​ជ្រាលជ្រៅ​ជូន​ចំពោះ​ម្ចាស់ជំនួយ និង​រាជរដ្ឋាភិបាល​កម្ពុជា ដែល​បាន​គាំទ្រ​លើ​ការអនុវត្ត​គម្រោង​នេះ និង​ជាពិសេស​ថ្លែងអំណរគុណ​យ៉ាង​ជ្រាលជ្រៅ​បំផុត​ជូន​ចំពោះ​សម្តេច​តេ​ជោ ដែល​បាន​គិតគូ យកចិត្តទុកដាក់​ខ្ពស់ និង​ផ្តល់​អនុសាសន៍​ល្អៗ​ដែលជា​ត្រីវិស័យ​សម្រាប់​ថ្នាក់ដឹកនាំ​ក្រសួង និង​មន្ត្រី​ជំនាញ​គ្រប់​ជាន់ថ្នាក់​យកទៅអនុវត្ត​ឲ្យ​ទាន់សភាពការណ៍​ជាក់ស្តែង នាពេល​បច្ចុប្បន្ន ធ្វើយ៉ាងណា​ពង្រឹង និង​ពង្រីក​វិស័យ​ផលិតកម្ម​ស្បៀង ធានា​ដល់​ការផ្គត់ផ្គង់​តម្រូវការ​ក្នុង​គ្រួសារ និង​ទីផ្សារ​ក្នុង​តំបន់​។ ចំពោះ​ការងារ​បច្ចេកទេស និង​ធ្វើយ៉ាងណា​ឲ្យ​គម្រោង​មាន​និរន្តរភាព ។

​លោក វេ​ង សាខុន បាន​ណែនាំ​ឲ្យ​នាយក​គ្រប់គ្រង​គម្រោង មន្ត្រី​អនុវត្ត​គម្រោង អាជ្ញាធរ​មូលដ្ឋាន និង​ប្រជាកសិករ ត្រូវ​បន្ត​សហការគ្នា​ឲ្យ​បាន​កាន់តែ​ល្អប្រសើរ​ក្នុងការ​ផ្សព្វផ្សាយ បណ្តុះបណ្តាល និង​អនុវត្ត​បច្ចេកទេស លើ​ការងារ​ចិញ្ចឹម បង្កាត់ ភ្ញាស់​កូន វិធី​លាយ​ផ្សំ​ចំណី និង​ការថែទាំ​សត្វ និង​ដំណាំ ហើយ​ជាងនេះទៅទៀត និង​សូម​ចូលរួម​ថែរក្សា​សន្តិភាព​ឲ្យ​បាន​គង់វង្ស មាន​សន្តិភាព ទើប​មានការ​អភិវឌ្ឍ (​អរគុណ​សន្តិភាព​) ៕

 

Filed in: ឃើញម៉េច ថាអញ្ចឹង, ព័ត៌មាន​ជាតិ, សន្តិសុខ-សង្គម

Recent Posts

Bookmark and Promote!


cen130 dap130 koh130 kampucheathmey130 nokorwat130 sbn130 sabay130