បរទេស ៖ អាជ្ញាធរបាននិយាយកាលពីថ្ងៃអង្គារថា ទឹកជំនន់បានសម្លាប់អ្នកជំងឺ១៧ នាក់នៅក្នុងមន្ទីរពេទ្យបន្ទាប់ពីមានភ្លៀងធ្លាក់ខ្លាំងនៅទីក្រុង Tula ស្ថិតនៅរដ្ឋ Hidalgo ភាគកណ្តាលប្រទេសម៉ិចស៊ិក។នេះបើយោងតាមប្រភពពីសារព័ត៌មាន ស៊ិនហួរ។
ភ្លៀងធ្លាក់ខ្លាំងកាលពីរសៀលថ្ងៃច័ន្ទនៅរដ្ឋ Hidalgo ដោយបណ្តាលឱ្យទឹកទន្លេនៅទីក្រុង Tula កើនឡើងដល់កម្រិតខ្ពស់ រហូតដល់ជន់លិចមន្ទីរពេទ្យធំមួយនៅទីក្រុងនេះតែម្តង។ អភិបាលរដ្ឋ Hidalgo លោក Omar Fayad បានប្រាប់សារព័ត៌មានថា“ ជាអកុសលមានអ្នកស្លាប់ចំនួន ១៧ នាក់” ។
យោងតាមរបាយការណ៍បានឲ្យដឹងថា អ្នកស្លាប់១៥នាក់មានជំងឺកូវីដ-១៩ ហើយបានស្លាប់ដោយសារ“មន្ទីរពេទ្យត្រូវបានជន់លិច ហើយថាមពលអគ្គីសនីក៏ត្រូវបានដាច់ ខណៈពួកគេកំពុងត្រូវការការជួយសង្គ្រោះផ្នែកផ្លូវដង្ហើម” ។
លោកបាននិយាយថា អ្នកស្លាប់ចំនួន ០២នាក់ទៀតបានមកដល់មន្ទីរពេទ្យ ដោយមិនមានរោគសញ្ញាអ្វីធ្ងន់ធ្ងរនោះទេ ហើយពួកគេក៏មានផ្ទុកជំងឺកូវីដ១៩ ដែរ។លោកបន្តថា មន្ទីរពេទ្យខាងលើនេះ គឺជាអគារមួយក្នុងចំណោមអគារទាំង ៥ នៅទីក្រុង Tula ដែលរងគ្រោះដោយសារទឹកជំនន់ខ្លាំងជាងគេ។ ដោយសារថាមពលអគ្គិសនី ត្រូវបានកាត់ផ្តាច់នៅទូទាំងទីក្រុង ម៉ាស៊ីនភ្លើងនៅមន្ទីរពេទ្យដែលបានរងការជន់លិច ក៏មិនអាចប្រើប្រាស់បានដែរ។ មុនពេលរងគ្រោះទឹកជំនន់ នៅក្នុងមន្ទីរពេទ្យខាងលើនេះ មានបុគ្គលិកបម្រើការងារចំនួន ១០៤នាក់ និងអ្នកជំងឺចំនួន ៥៦នាក់ ហើយប្រហែលជាពាក់កណ្តាលនៃពួកគេ គឺមានផ្ទុកជំងឺកូវីដ១៩ ៕