ខេត្តបន្ទាយមានជ័យ ៖ យោងតាមពាក្យបណ្ដឹងរបស់ជនរងគ្រោះឈ្មោះ សាយ សំអាត ភេទប្រុស អាយុ៣៨ឆ្នាំ រស់នៅភូមិក្បាលស្ពាន២ សង្កាត់/ក្រុងប៉ោយប៉ែត ខេត្តបន្ទាយមានជ័យ ស្ដីពីករណីបាត់ម៉ូតូ០១គ្រឿងម៉ាកហុងដាឃ្លិច ពណ៌ស ផលិតឆ្នាំ២០១៧ គ្មានផ្លាកលេខ ក្នុងខណជនរងគ្រោះចតទុកមុខតូបលក់ដូរដោយភ្លេចដកកូនសោរ កាលពីវេលាម៉ោងជាង១២រំលងអាធ្រាត ឈានចូលថ្ងៃទី០៨ ខែកញ្ញា ឆ្នាំ២០២១ ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឱ្យដឹងថា ក្រោយពីទទួលបានពាក្យបណ្ដឹងរួច លោកបានដឹកនាំកម្លាំងចុះធ្វើប្រតិបត្តិការស្រាវជ្រាវរហូតដល់ថ្ងៃទី០៩ ខែកញ្ញា ឆ្នាំ២០២១ វេលាម៉ោង១៣និង៣៩នាទី ទើបឃាត់ខ្លួនបានជនសង្ស័យចំនួន០២នាក់ ១/.ឈ្មោះ ប លីណា ហៅ សី ភេទប្រុស អាយុ៤៩ឆ្នាំ រស់នៅមិនពិតប្រាកដ ក្នុងក្រុងប៉ោយប៉ែត ២/.ឈ្មោះ ពេជ្រ សីហា ហៅ ឆៃ ភេទប្រុស អាយុ៣៤ឆ្នាំ បច្ចុប្បន្នរស់នៅភូមិក្បាលស្ពាន២ សង្កាត់/ក្រុងប៉ោយប៉ែត ខេត្តបន្ទាយមានជ័យ ។
ជនសង្ស័យទាំង០២នាក់ក្រោយពីសម្ថកិច្ចឃាត់ខ្លួន ត្រូវបានបញ្ជូនមកមូលដ្ឋានកងរាជអាវុធហត្ថក្រុងដើម្បីសាកសួរចម្លើយ ។ ក្រោយពីសាកសួរចម្លើយរួចជនសង្ស័យបានឆ្លើយសារភាពថា ពួកគេបានប្រកបរបរដើររើសអេតចាយជារៀងរាល់យប់ ហើយនៅថ្ងៃទី០៨ ខែកញ្ញា ឆ្នាំ២០២១នេះ ពួកគេបានដើររើសអេតចាយរហូតដល់ម៉ោងជាង១២យប់ ស្រាប់តែឃើញម៉ូតូ០១គ្រឿងដូចមានភិនភាគក្នុងពាក្យបណ្ដឹងចតទុកចោលនៅមុខតូបលក់ដូរ ហើយមានទាំងកូនសោរនៅជាប់នឹងម៉ូតូទៀតផង ហើយពួកគេក៏នាំគ្នាលួចយកម៉ូតូនោះតែម្ដង ហើយជិះយកទៅដាក់បញ្ចាំឱ្យសន្តិសុខម្នាក់មិនស្គាល់ឈ្មោះ ធ្វើការនៅកាស៊ីណូនាគទិព្វ បានលុយថៃចំនួន ១៥,០០០បាត(មួយម៉ឺនប្រាំពាន់បាត) ហើយនាំគ្នាយកលុយនោះដើរស៊ីចាយអស់ ។
លោកវរសេនីយ៍ត្រី នួន នីណារ៉ូ បានបញ្ជាក់ទៀតថា ដោយផ្អែកលើពាក្យបណ្ដឹងរបស់ជនរងគ្រោះ និងផ្អែកលើចម្លើយសារភាពរបស់ជនសង្ស័យទាំង០២នាក់ ដូច្នេះជនសង្ស័យត្រូវបានកម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែតកសាងសំណុំរឿងបញ្ជូនមកបញ្ជាការដ្ឋានកងរាជអាវុធហត្ថខេត្តចាត់បន្ត។ចំណែកអ្នកទទួលបញ្ចាំម៉ូតូសមត្ថកិច្ចកំពុងស្រាវជ្រាវឃាត់ខ្លួនបន្តទៀត ។
បច្ចុប្បន្នជនសង្ស័យទាំង០២នាក់ ត្រូវបានកម្លាំងការិយាល័យព្រហ្មទណ្ឌកងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅរសៀលថ្ងៃទី១០ ខែកញ្ញា ឆ្នាំ២០២១នេះ ៕
