វៀងច័ន្ទ៖ ប្រព័ន្ធផ្សព្វផ្សាយក្នុងស្រុកមួយបានរាយការណ៍នៅថ្ងៃពុធនេះថា អាជ្ញាធរសុខាភិបាលឡាវកំពុងពិចារណាលើជម្រើសនៃការចាក់វ៉ាក់សាំងការពារជំងឺកូវីដ ១៩ ដូសទី ៣ ដើម្បីពង្រឹងប្រព័ន្ធធាតុស៊ាំការពាររាងកាយរបស់មនុស្ស ដើម្បីប្រឆាំងនឹងជំងឺកូវីដ -១៩ ថ្មីដូចជា Delta ជាដើម។
បើយោងតាមការបញ្ជាក់របស់ កាសែតវៀងច័ន្ទថាមស៍បានឲ្យដឹងថា ការសិក្សាកំពុងដំណើរការនៅប្រទេសឡាវស្តីពីប្រសិទ្ធភាពនៃវ៉ាក់សាំងដូសទី ៣ ដើម្បីការពារកុំឱ្យមានការឆ្លងរីករាលដាលនូវវីរុសកូវីដ ១៩ បម្លែងខ្លួនថ្មី Delta ដោយក្នុងកិច្ចសហការយ៉ាងជិតស្និទ្ធជាមួយនឹងអង្គការសុខភាពពិភពលោក (WHO) ។
អគ្គនាយកដ្ឋានប្រយុទ្ធប្រឆាំងនឹងជំងឺឆ្លងកូវីដ ១៩ ឡាវលោករតនៈសាយភឿសុវ៉ាន់ (Rattanaxay Phetsouvanh) កាលពីថ្ងៃអង្គារម្សិលមិញបានប្រាប់អ្នកកាសែតថា ការសិក្សាកំពុងធ្វើឡើង ដើម្បីព្យាយាមកំណត់ថាតើវ៉ាក់សាំងកូវីដ -១៩ ចាក់លើកទី ៣ នេះអាចបង្កើនភាពស៊ាំបានដែរឬទេ។
លោករតនៈសាយភឿសុវ៉ាន់ក៏បានបន្តថា មនុស្សភាគច្រើនបានសម្តែងការចាប់អារម្មណ៍ចំពោះការចាក់វ៉ាក់សាំងបង្ការនេះ ក៏ដូចជាការចាក់ដូសទី ៣ នេះផងដែរ។ ប៉ុន្តែនៅដំណាក់កាលនេះមិនមានភស្តុតាងវិទ្យាសាស្ត្រណាមួយដែលបានបង្ហាញពីប្រសិទ្ធិភាពនៃការចាក់ដូសទី ៣ នេះនៅឡើយទេ។.ភ្នំពេញថ្មី៕ប្រភព៖ Xinhua News
