រាជធានីភ្នំពេញ ៖ សមត្ថកិច្ចបានឆ្មក់ចុះបង្ក្រាបទីតាំងល្បែងស៊ីសងខុសច្បាប់មួយកន្លែង ដែលជាប្រភេទ ហ្គេមបាញ់ត្រី និងល្បែងហ្គេម Slot Machinesយីហោ “ជីនសេង ទីក្រុងអានីម“ ស្ថិតក្នុងខណ្ឌចំការមន រាជធានីភ្នំពេញ។
តាមពត៌មានទទួលបានទីតាំងល្បែងមួយកន្លែងនេះសំបូរទៅដោយក្រុមអ្នកញៀនល្បែង ចូលលេងយ៉ាងសប្បាយរីករាយ ក្នុងអំឡុងពេលដែលពលរដ្ឋគ្រប់គ្នាមានការខ្លាចឆ្លងជំងឺកូវីដ១៩។យ៉ាងណាក៏ដោយ ខណដែលសមត្ថកិច្ចចុះបង្ក្រាបនោះ ក្រុមអ្នកញៀនល្បែងទាំងនោះបានរត់ចែកជើងគ្នាបាត់អស់ នៅសល់តែមនុស្សប្រុសស្រីមិនដល់១០នាក់ទេ ត្រូវបានអាជ្ញាធរនាំខ្លួនទៅសាលាខណ្ឌចំការមន ដើម្បីប្រគល់អោយអធិការដ្ឋាននគរបាលខណ្ឌចំការមនធ្វើការសាកសួរនិងបន្តនិតិវិធី។ប៉ុន្តែសមត្ថកិច្ចមិនបាន ដកហូតសម្ភារៈអ្វីឡើយដោយ គ្រាន់តែធ្វើកំណត់ហេតុបិទខ្ទប់ប៉ុណ្ណោះ ។
សូមជម្រាបថា ការចុះបង្ក្រាបនេះ ធ្វើឡើងនាយប់ថ្ងៃទី១៧ ខែកញ្ញា ២០២១នេះ ខណដែលគេដឹងថានេះ មិនមែនជាលើកទី១ទេ ដែលត្រូវបានសមត្ថកិច្ចចុះបង្ក្រាបតែបានចុះបង្ក្រាបច្រើនលើកមកហើយតែមិនបានប៉ុន្មានផង ក៏បើកឡើងវិញ នៅក្នុងមជ្ឈមណ្ឌលពាណិជ្ជកម្មផ្លូវមាស Golden Street មុខអាគារ The Bridgeក្នុង សង្កាត់ទន្លេបាសាក់ ខណ្ឌចំការមន រាជធានីភ្នំពេញ ៕
