កីឡា ៖ ខ្សែបម្រើ Paul Pogba របស់ក្រុមបិសាចក្រហម Manchester United អាចនឹងត្រលប់ទៅ Juventus វិញនៅពេលកិច្ចសន្យារបស់គេនៅទឹកដី Old Trafford ផុតកំណត់នៅខែមិថុនា ឆ្នាំក្រោយ។ នេះបើយោងតាមភ្នាក់ងាររបស់កីឡាសញ្ជាតិបារាំងរូបនេះគឺលោក Mino Raiola ។
Pogba បានចាប់ផ្តើមយុទ្ធនាការឆ្នាំ ២០២១-២២ ក្នុងទម្រង់ដ៏គួរឱ្យចាប់អារម្មណ៍សម្រាប់បិសាចក្រហមដោយបានបញ្ជូនបាល់ដៃគូបានចំនួន ៧ ដងក្នុងការបង្ហាញខ្លួន ៤ ប្រកួតសម្រាបក្រុម ។
អនាគតរបស់កីឡាករវ័យ ២៨ ឆ្នាំរូបនេះជាមួយក្រុមជើងឯកអង់គ្លេស ២០ សម័យនៅតែមិនច្បាស់លាស់នៅឡើយទេ ទោះបីជាកិច្ចព្រមព្រៀងបច្ចុប្បន្នរបស់គេនឹងត្រូវផុតកំណត់នៅឆ្នាំ ២០២២ ក៏ដោយ។
លោក Raiola បានណែនាំថាកូនក្រុមរបស់គាត់អាចចុះកុងត្រាថ្មីជាមួយក្រុមរបស់លោក Ole Gunnar Solskjaer ប៉ុន្តែភ្នាក់ងារដ៏ល្បីរូបនេះក៏បាននិយាយផងដែរអំពីការវិលត្រឡប់ទៅកាន់ទីក្រុង Turin វិញសម្រាប់ Pogba ។
លោក Raiola បានប្រាប់ Rai Sport ថា “Paul Pogba ផុតកុងត្រានៅខែមិថុនាដូច្នេះយើងនឹងពិភាក្សាជាមួយ Man Utd ហើយយើងនឹងមើលថាតើមានអ្វីកើតឡើង? Juventus? Paul នៅតែស្រលាញ់ Turin ។ មានឱកាស Pogba នឹងត្រលប់មក Juventus វិញប៉ុន្តែវាអាស្រ័យលើកិច្ចសន្យា ។
Pogba ពីមុនបានចាកចេញពី Man United ទៅ Juventus នៅឆ្នាំ ២០១២ ហើយបានចំណាយពេល ៤ឆ្នាំជាមួយក្លឹបយក្សអ៊ីតាលីដោយឈ្នះពាន Serie A ៤ ដងនិងពាន Coppa Italia ២ ដងមុននឹងត្រលប់មក Manchester វិញ។ ចំណែកក្រុម Barcelona, Real Madrid និង Paris Saint-Germain ក៏ត្រូវបានគេជឿជាក់ថាកំពុងតាមដានស្ថានការណ៍នេះរបស់កីឡាករូបនេះផងដែរ៕
