អ៊ីស្លាម៉ាបាដ៖ នាយករដ្ឋមន្ត្រីប៉ាគីស្ថានលោកអ៊ីមរ៉ានខាន់ (Imran Khan) បានព្រមានពីហានិភ័យនៃសង្គ្រាមស៊ីវិលដែលអាចនឹងកើតមាននៅអាហ្វហ្កានីស្ថាន ប្រសិនបើក្រុមសកម្មប្រយុទ្ធតាលីបង់នៅតែមិនអាចបង្កើតរដ្ឋាភិបាល ដែលរួមបញ្ចូលគ្នាតែមួយបានទេនោះ។. ភ្នំពេញថ្មី
គួរបញ្ជាក់ថា លោកខាន់ បានថ្លែងប្រាប់បណ្តាញសារព័ត៌មាន BBC ក្នុងអំឡុងសន្និសីទមួយថា ប្រសិនបើពួកគេនៅតែមានភាពខ្វែងគំនិតគ្នា និងមិនមានរដ្ឋាភិបាលដែលរួមគំនិតគ្នាតែមួយនោះទេ នោះគឺវានឹងធ្វើឲ្យប្រទេសនេះធ្លាក់ចូលទៅក្នុងសង្គ្រាមស៊ីវិលក្នុងពេលឆាប់ៗនេះ ហើយវាអាចនឹងធ្វើឲ្យប៉ះពាល់ដល់ប្រទេសប៉ាគីស្ថានផងដែរ។
លោកខាន់ ក៏បានបន្ថែមទៀតថា ប្រទេសរបស់លោកមានការព្រួយបារម្ភជាចម្បងអំពីលទ្ធភាពនៃវិបត្តិមនុស្សធម៌ និងជនភៀសខ្លួនប្រសិនបើសង្គ្រាមស៊ីវិលនេះផ្ទុះឡើងពិតមែននោះ។
រដ្ឋាភិបាលលោកខាន់ បានអំពាវនាវម្តងហើយម្តងទៀតឱ្យពិភពលោកចូលរួមជាមួយនឹងរដ្ឋាភិបាលបណ្តោះអាសន្នរបស់តាលីបង់ដើម្បីការពារការដួលរលំនៃរចនាសម្ព័ន្ធរបស់អាហ្វហ្គានីស្ថានក្នុងករណីផ្សេងៗដែលអាចនឹងកើតមានជាយថាហេតុ៕ប្រភព៖ ALJAZEERA NEWS