វ៉ាស៊ីនតោន៖ សហរដ្ឋអាមេរិកបានប្រកាស កាលពីថ្ងៃសុក្រថា ខ្លួនកំពុងរៀបចំបញ្ជូនវ៉ាក់សាំងការពារជំងឺកូវីដ -១៩ ប្រភេទ Pfizer ជាង ៨ លានដូស ផ្ដល់ទៅកាន់ប្រទេសបង់ក្លាដែស និងហ្វីលីពីនដែលជាសម្ព័ន្ធមិត្ត ក្នុងរលកចុងក្រោយនៃជំនួយដល់ពិភពលោក ដែលកំពុងជួបការលំបាកក្នុងការទប់ទល់នឹងជំងឺរាតត្បាតមួយនេះ។.ភ្នំពេញថ្មី
មន្ត្រីសេតវិមានម្នាក់បានប្រាប់ឲ្យដឹងថា ការដឹកជញ្ជូនតាមជើងយន្តហោះចំនួន ៥ ដែលមានវ៉ាក់សាំងចំនួនសរុប ៥.៥៧៥.០៥០ ដូសនឹងទៅដល់ប្រទេសហ្វីលីពីននៅសប្តាហ៍ក្រោយ។
មន្ត្រីរូបនេះបានបន្តថា វ៉ាក់សាំងចំនួន ២.៥០៨.៤៨០ ដូសផ្សេងទៀត នឹងទៅដល់ប្រទេសបង់ក្លាដែសនៅដើមសប្ដាហ៍ក្រោយនេះហើយ ដែលជាការបរិច្ចាគតាមរយៈកម្មវិធី COVAX របស់អង្គការសុខភាពពិភពលោក (WHO) ផងដែរ។
យោងតាមមូលដ្ឋានទិន្នន័យរបស់ AFP បានបញ្ជាក់ថា ប្រជាជនរបស់ប្រទេសបង់ក្លាដែសមានប្រហែល ១០ ភាគរយប៉ុណ្ណោះដែលទទួលបានការចាក់វ៉ាក់សាំងការពារជំងឺកូវីដ ១៩ បានពេញលេញ៕.
ប្រភព៖ CAN NEWS
