ម៉ូស្គូ៖ វ៉ាក់សាំងប្រភេទ Sputnik Light របស់ប្រទេសរុស្ស៊ី បង្ហាញប្រសិទ្ធភាពការពារខ្ពស់ប្រឆាំងនឹងវីរុសកូវីដ ១៩ បំប្លែងខ្លួនថ្មីដ៏កាចសាហាវ Delta ដែលមានសមត្ថភាពចម្លងលឿន ហើយប្រសិនបើចាក់ជាដូសជំរុញលើវ៉ាក់សាំងប្រភេទផ្សេងរឹតតែបង្កើតប្រព័ន្ធភាពស៊ាំយ៉ាងខ្លាំង។.ភ្នំពេញថ្មី
គួរបញ្ជាក់ថា វ៉ាក់សាំងប្រភេទ Sputnik Light នេះគឺជាសមាសធាតុសំខាន់ដំបូងគេ បន្ទាប់ពីវ៉ាក់សាំងចាក់ ២ ដូស Sputnik V ដែលជាវ៉ាក់សាំងបង្ការជំងឺកូវីដ-១៩ឈានមុខគេនៅប្រទេសរុស្ស៊ីដែលបានផ្តល់ទៅកាន់ទីផ្សារអន្តរជាតិ។
មូលនិធិវិនិយោគផ្ទាល់រុស្ស៊ី RDIF បានឲ្យដឹងនៅក្នុងសេចក្តីប្រកាសព័ត៌មានមួយថា វ៉ាក់សាំង Sputnik Light ចាក់តែ១ដូសគឺមានប្រសិទ្ធភាពខ្ពស់ដល់ទៅ ៧០ ភាគរយប្រឆាំងនឹងការឆ្លងពីវីរុសបំប្លែងខ្លួនកាចសាហាវ Delta កំឡុងពេល ៣ ខែដំបូង បន្ទាប់ពីចាក់ហើយ។ វាមានប្រសិទ្ធភាព ៧៥ ភាគរយ ចំពោះមនុស្សដែលមានអាយុក្រោម៦០ឆ្នាំ និងជួយទប់ស្កាត់ការវិវត្តនៃជំងឺទៅរកសភាពធ្ងន់ធ្ងរ។
សេចក្តីសន្និដ្ឋានផ្អែកលើទិន្នន័យដែលទទួលបានពីការសិក្សាទៅលើអ្នកស្ម័គ្រចិត្តចំនួន ២៨០០០ នាក់ត្រូវបានប្រមូលនៅក្នុងទីក្រុងម៉ូស្គូ ក្នុងខែកក្កដា។ លោក Denis Logunov អនុប្រធានមជ្ឈមណ្ឌលជាតិ Gamaleya បានឲ្យដឹងថា ការសិក្សារៀបចំដោយផលិតករវ៉ាក់សាំង មជ្ឈមណ្ឌលស្រាវជ្រាវជាតិ Gamaleya នៃរោគរាតត្បាត និងមីក្រូជីវវិទ្យា ហើយបង្ហាញថា វ៉ាក់សាំង Sputnik Light នេះមានប្រសិទ្ធភាពខ្ពស់បានរយៈពេលយូររាប់ខែ បន្ទាប់ពីចាក់ផងដែរ៕
ប្រភព៖ Reuter NEWS