រាជធានីភ្នំពេញ ៖ រដ្ឋសភាកម្ពុជា នៅព្រឹកថ្ងៃទី១៤ ខែតុលា ឆ្នាំ២០២១នេះ បានបើកកិច្ចប្រជុំគណៈកម្មាធិការអចិន្ត្រៃយ៍ ដើម្បីពិនិត្យសេចក្តីព្រាងច្បាប់ស្តីពីវិសោធនកម្មរដ្ឋធម្មនុញ្ញ និងធម្មនុញ្ញបន្ថែម ពាក់ព័ន្ធនឹងការកំណត់ឱ្យមានសញ្ជាតិខ្មែរតែមួយ ចំពោះឥស្សរជនដែលកាន់តំណែងប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ ដែលបានស្នើឡើងដោយរាជរដ្ឋាភិបាលកម្ពុជា។
តាមនិតិវិធី ក្រោយពីពិនិត្យ សេចក្តីព្រាងច្បាប់រួចរាល់ នោះ សេចក្តីព្រាងច្បាប់ស្តីពីវិសោធនកម្មរដ្ឋធម្មនុញ្ញនេះ នឹងត្រូវប្រគល់ជូន គណៈកម្មការនីតិកម្ម និងយុត្តិធម៌នៃរដ្ឋសភា ដើម្បីពិនិត្យ និងសិក្សា ហើយបញ្ជូនមកគណៈកម្មាធិការអចិន្ត្រៃយ៍ដើម្បីកំណត់ការប្រជុំពេញអង្គ ដើម្បីអនុម័ត៕