ដាម៉ាស៖ ការវាយប្រហារតាមដែនអាកាសរបស់អ៊ីស្រាអែល នៅភាគកណ្តាលប្រទេសស៊ីរីបានសម្លាប់ទាហានស៊ីរីម្នាក់ និងយុទ្ធជនគាំទ្រអ៊ីរ៉ង់ ៣ នាក់ផ្សេងទៀតបានរងរបួស។ នេះបើយោងតាមការបញ្ជាក់របស់អ្នកឃ្លាំមើលសង្គ្រាមដែលមានមូលដ្ឋាននៅចក្រភពអង់គ្លេស។.ភ្នំពេញថ្មី
ទីភ្នាក់ងារសារព័ត៌មានរដ្ឋរបស់ប្រទេសស៊ីរី SANA បានដកស្រង់សម្ដីយោធាម្នាក់របស់ស៊ីរី ដោយបាននិយាយថា ការវាយប្រហារ កាលពីថ្ងៃពុធ នៅជិតទីក្រុង Palmyra ក្នុងខេត្ត Homs បានសម្លាប់ទាហានស៊ីរីម្នាក់ និងរបួស ៣ នាក់ផ្សេងទៀត។
យោធាដដែលបានបន្តថា នៅម៉ោងប្រមាណ ២៣ ៖ ៣៤ (២០ ៖ ៣៤ GMT) ម៉ោងនៅក្នុងស្រុក សត្រូវអ៊ីស្រាអែលបានធ្វើសកម្មភាពឈ្លានពានពីលើអាកាស មកក្នុងតំបន់ប៉ាលមីរ៉ា (Palmyra) ដោយផ្តោតលើបន្ទាយទំនាក់ទំនង និងទីតាំងជាច្រើនទៀតដែលនៅក្បែរនោះ។
ក្រុមអ្នកសង្កេតការណ៍ បានឲ្យដឹងថា យន្តហោះចម្បាំងរបស់អ៊ីស្រាអែលបានហោះឆ្លងកាត់តំបន់ត្រីកោណព្រំដែនរវាង អ៊ីរ៉ាក់- ស៊ីរី- ហ្ស៊កដានី នៅពេលការវាយប្រហារនោះ។
គួរបញ្ជាក់ថា ការវាយប្រហារនេះបានសម្លាប់ទាហានស៊ីរីម្នាក់ និងយុទ្ធជនគាំទ្រអ៊ីរ៉ង់ ៣ នាក់ផ្សេងទៀតផងដែរ៕
ប្រភព៖ ALJAZEERA NEWS
