ឥណ្ឌូនេស៊ី ៖ មនុស្ស៣នាក់បានស្លាប់និង៧ នាក់ផ្សេងទៀតបានរងរបួស បន្ទាប់ពីគ្រោះរញ្ជួយដីកម្រិត៤.៨ រ៉ិចទ័របានវាយប្រហារ កោះបាលីរបស់ឥណ្ឌូនេស៊ីកាលពីព្រឹកថ្ងៃសៅរ៍នេះ។
មជ្ឈមណ្ឌលរញ្ជួយដីនៃប្រទេសឥណ្ឌូនេស៊ី បានឲ្យដឹងថា ការរញ្ជួយដីខាងលើបានកើតឡើងនៅវេលាម៉ោង ៣ និង ១៨ នាទីព្រឹកម៉ោងក្នុងតំបន់ដែលមានជម្រៅ ១០ គីឡូម៉ែត្រពីក្រោមដី។ ទីភ្នាក់ងារនេះបាននិយាយថាការរញ្ជួយដីនេះមិនបង្កឱ្យមានរលកយក្សស៊ូណាមិឡើយ។
ប្រធានអង្គភាពប្រតិបត្តិការនៃទីភ្នាក់ងារគ្រប់គ្រងគ្រោះមហន្តរាយនៃខេត្តបាលីលោក Gede Adhi Tiana Putra បានប្រាប់ទីភ្នាក់ងារសារព័ត៌មានស៊ីនហួថាមនុស្សពីរនាក់បានស្លាប់នៅក្នុងស្រុក Bangliនិង មនុស្សម្នាក់បានស្លាប់ នៅក្នុងស្រុក Karangasem ។
លោកបាននិយាយថាមនុស្សចំនួន៧នាក់ដែលរងរបួសត្រូវបានគេព្យាបាលនៅមន្ទីរពេទ្យក្បែរនោះ។ ផ្ទះជាច្រើនខ្នងត្រូវបានបំផ្លាញដោយសាររញ្ជួយដីហើយការខូចខាតភាគច្រើននៅក្នុងស្រុកបាងលី៕
