អាចនិយាយថាជាលើកដំបូងហើយដែលក្រុមជើងកាងសង្វៀនបញ្ជល់មាន់ក្នុងឃុំត្បែង ស្រុកបាទី ខេត្តតាកែវប្រើដំបងដេញវ៉ៃអ្នកសារពត៌មានដែលចុះយកពត៌មាននៃអំពើខុសច្បាប់ ដែលគេដឹងថាសង្វៀនខុសច្បាប់មានម្ចាស់ងាជាឧកញ៉ា។ករណីនោះកើតទ្បើងកាលពីរសៀលថ្ងៃទី១៦ ខែតុលា ឆ្នាំ២០២១ ម្សិលមិញ។ប៉ុន្តែអ្វីដែលហួសចិត្តនោះ ក្រោយផ្ទុះហិង្សាលើអ្នកសារពត៌មានក៏ស្រាប់តែសមត្ថកិច្ចប្រញ៉ាប់ប្រញ៉ាប់ចុះបង្ក្រាបសង្វៀនជល់មាន់របស់លោកឧកញ៉ានោះភ្លាមៗដែរ តែគេដឹងថាចាប់បានតែខ្យល់ប៉ុណ្ណោះ។
សាធារណជនបានធ្វើការរិះគន់យ៉ាងខ្លាំងចំពោះចំណាត់ការខ្យល់ព្យុះរបស់សមត្ថកិច្ចព្រោះថា សង្វៀនបញ្ជល់មាន់ដ៏ធំសម្បើមនេះបើកលេងរាប់ឆ្នាំមកហើយ ហើយបើទោះបីមូលដ្ឋាននោះផ្ទុះកូវីដក៏ដោយក៏ពួកគេអត់ផ្អាកដែរគឺបើកលេងជារៀងរហូតតែម្តង។
ប៉ុន្តែគេគួរតែពិចារណាទៅថា តើហេតុអ្វីបាបជាលោកឧកញ៉ាម្នាក់នោះអាចបើកសង្វៀនជល់មាន់យ៉ាងធំ ហើយបើកដោយរលូនពុំមានការភយ័ព្រួយឬការបង្ក្រាបពីសមត្ថកិច្ចដូច្នេះ ? តើសមត្ថកិច្ចមិនដឹងឬយ៉ាងម៉េច ឬក៏ដឹងដែរតែធ្វើមិនដឹង?។គ្មានអ្នកណាអាចឆ្លើយនូវសំណួរនេះជំនួសសមត្ថកិច្វបាននោះទ្បើយ។
យ៉ាងណាក៌ដោយ សាធារណជនគ្រាន់តែបង្ហាញនូវការហួសចិត្តថា បើកុំតែមានករណីប្រើហិង្សាលើអ្នកសារពត៌មាន កុំអីសង្វៀនជល់មាន់ក្នុងស្រុកបាទីដែលគេសង្សយ័ថាជារបស់ឧកញ៉ាម្នាក់នោះ នៅបន្តបើកជារៀងរហូតដោយគ្មានការបង្ក្រាបនោះទ្បើយ។និយាយអញ្ចឹងមិនមាននយ័ថាសមត្ថកិច្ចអសមត្ថភាពនោះទេ តែលោកម្ចាស់សង្វៀនជល់មាន់ឯណោះទេដែលមានបរមីខ្ពស់ ដែលអាចប្រើវេទមន្តសណ្តំចិត្តនិងបំបិទភ្នែកសមត្ថកិច្ចបានដោយរលូនគួរឲ្យកោតសរសើរ។
សាធារណជនគ្រាន់តែលើកទ្បើងនូវការយល់ឃើញខ្លះៗថា បើកុំតែកើតមានអំពើហិង្សាដេញវាយអ្នកសារពត៌មានផ្អើលពេញនគរ កុំអីក៏មិនដឹងដល់សមត្ថកិច្ចចុះបង្ក្រាបដែរសង្វៀនបញ្ជល់មាន់ដ៏ធំនោះដែរ មិនថាអញ្ចឹងហ្អ៎ក ?ដូច្នេះអ្នកសារពត៌មានក៏មានគុណសម្បត្តិដែរមិនអាចមើលរំលងនោះទ្បើយ ខណដែលសមត្ថកិច្ចក៏មិនត្រូវភ្លេចគុណសម្បត្តិរបស់អ្នកសារពត៌មាននោះដែរ ។
សូមជម្រាបថានៅរសៀលថ្ងៃទី១៦ ខែតុលា ឆ្នាំ២០២១ លោកវរសេនីយ៍ឯក ឆាយ កែវមុន្នី អធិការនគរបាលស្រុកបាទី បានអញ្ជើញចូលរួម និងអមដំណើរ លោក ភួន ឈីម អភិបាលនៃគណៈអភិបាលស្រុកបាទី ដឹកនាំបញ្ជាកងកម្លាំងនគរបាល ចុះបង្ក្រាបទីតាំងជល់មាន់មួយកន្លែងស្ថិតនៅភូមិត្បែង ឃុំក្រាំងធ្នង់ ស្រុកបាទី ខេត្តតាកែវ ។ការចុះបង្ក្រាបនោះធ្វើទ្បើង បន្ទាប់ពីករណីផ្ទុះហិង្សាលើអ្នកសារពត៌មានដែលចុះយកពត៌មាននៅចំណុចសង្វៀនបញ្ជល់មាន់ដ៏ធំមហិមាខាងលើ ដែលករណីនោះក៏បានបង្កការភ្ញាក់ផ្អើលដល់ថ្នាក់ដឹកនាំខាងលើផងដែរ ៕
