ហាណូយ៖ មជ្ឈមណ្ឌលជាតិព្យាករណ៍ឧតុនិយមវៀតណាម (NCHF) បានឲ្យដឹងថា ភ្លៀងធ្លាក់ខ្លាំងនឹងបន្តអូសបន្លាយនៅភាគកណ្តាលនៃប្រទេសវៀតណាម រហូតដល់ចុងខែ វិច្ឆិកា នេះ ហើយទំនងជាអាចនឹងរងការវាយប្រហារដោយព្យុះចំនួន ៣ ផ្សេងទៀតនៅឆ្នាំនេះ។
លោក Tran Quang Nang មន្ត្រីមកពី NCHF បានបញ្ជាក់ថា សីតុណ្ហភាពចុះត្រជាក់ខ្លាំង ក្រោយភ្លៀងធ្លាក់យ៉ាងខ្លាំងនៅទូទាំងខេត្តភាគកណ្តាលក្នុងរយៈពេលប៉ុន្មានថ្ងៃកន្លងមកនេះ។ លោក បន្តថា ចាប់ពីថ្ងៃទី ១១ ដល់ថ្ងៃទី ១៤ ខែ វិច្ឆិកានេះ ភ្លៀងនឹងបន្តធ្លាក់មកលើតំបន់ជាច្រើន ជាពិសេសតំបន់ភាគកណ្តាល និងភាគខាងត្បូងប្រទេស។
ទន្ទឹមនោះ ទឹកភ្លៀងទំនងជានឹងឡើងដល់កម្រិត ១០០ ទៅ ២៥០ មីលីម៉ែត្រនៅក្នុងខេត្ត Thua Thien ខេត្ត Hue ខេត្ត Da Nang ខេត្ត Quang Nam និងខេត្ត Khanh Hoa (.ភ្នំពេញថ្មី.) និងរហូតដល់ ៦៥០ មីលីម៉ែត្រផងដែរ។
គួរបញ្ជាក់ថា តំបន់ភាគកណ្ដាលប្រទេសវៀតណាម ទំនងជារងការវាយប្រហារដោយភ្លៀងធ្លាក់ខ្លាំងពេញមួយខែវិច្ឆិកានេះ ហើយកម្រិតទឹកភ្លៀងខ្ពស់បំផុតនឹងកត់ត្រារវាងខេត្ត Quang Binh ភាគខាងជើង និងខេត្ត Khanh Hoa ភាគខាងត្បូង៕
ប្រភព៖ VNEXPRESS NEWS
