ស្រីលង្កា៖ ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃអង្គារថា អ្នកជំនាញផ្នែកសុខភាពនៅប្រទេសស្រីលង្កាបានព្រមានពីការផ្ទុះឡើងនៃជំងឺគ្រុនឈាមនៅក្នុងប្រទេសនេះ ខណៈភ្លៀងធ្លាក់ខ្លាំងដែលបានបណ្តាលឱ្យមានទឹកជំនន់នៅក្នុងស្រុកមួយចំនួន។នេះបើយោងតាមប្រភពពីសារព័ត៌មាន ស៊ិនហួរ។
យោងតាមតួលេខផ្លូវការ បានឲ្យដឹងថា អ្នកជំងឺគ្រុនឈាមសរុបចំនួន ១,៣៦១ នាក់ត្រូវបានរាយការណ៍ក្នុងរយៈពេល ១០ ថ្ងៃដំបូងក្នុងខែវិច្ឆិកា។
គ្រូពេទ្យសហគមន៍នៅអង្គភាពប្រយុទ្ធប្រឆាំងនិងជំងឺគ្រុនឈាមជាតិ លោកវេជ្ជបណ្ឌិត Shilanthi Seneviratne ត្រូវបានសារព័ត៌មានក្នុងស្រុកដកស្រង់សម្តីថា មានអ្នកជំងឺវិជ្ជមានតែ ៧៧០នាក់ប៉ុណ្ណោះសម្រាប់ពេញមួយខែវិច្ឆិកាឆ្នាំមុន ប៉ុន្តែឆ្នាំនេះវាបានកើនលើសចំនួន ១០០០ នាក់ក្នុងរយៈពេលត្រឹមតែ ១០ ថ្ងៃនៃខែនេះ។ .
លោកបន្តថា ភ្លៀងធ្លាក់ខ្លាំងនាពេលបច្ចុប្បន្ន និងបង្កជាទឹកជំនន់បានបង្កើតកន្លែងបន្ថែមទៀតសម្រាប់ការបង្កាត់ពូជមូស។ យោងតាមតួលេខផ្លូវការ ករណីជាច្រើនត្រូវបានរកឃើញពីរដ្ឋធានី Colombo និង Batticaloa ក្នុងខេត្តភាគខាងកើត។
យ៉ាងណាមិញអ្នកជំនាញផ្នែកវេជ្ជសាស្ត្របានជំរុញឱ្យប្រជាពលរដ្ឋស្វែងរកសេវាព្យាបាលជាបន្ទាន់ ប្រសិនបើពួកគេមានគ្រុនក្តៅខ្លាំង ក្អួត ឈឺពោះ ឬវិលមុខក្នុងចំណោមរោគសញ្ញាផ្សេងទៀតនៃជំងឺគ្រុនឈាម៕