កីឡា ៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា និងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញដឹកនាំគណៈប្រតិភូកីឡាកម្ពុជា ចាកចេញពីមាតុប្រទេស នៅព្រឹកថ្ងៃទី២០ ខែវិច្ឆិកា ឆ្នាំ២០២១ ដើម្បីចូលរួមមហាសន្និបាតក្រុមប្រឹក្សាកីឡាអូឡាំពិកអាស៊ី និងចុះហត្ថលេខាទទួលសិទ្ធិធ្វើជាម្ចាស់ផ្ទះ ការប្រកួតកីឡាយុវជនអាស៊ី (ASIAN Youth Games) នាឆ្នាំ២០២៩។
ថ្លែងមុនពេលចេញដំណើរ ឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) មានប្រសាសន៍ថា ដោយទទួលបានការអនុញ្ញាតពីរាជរដ្ឋាភិបាលកម្ពុជា គណៈប្រតិភូគណៈកម្មាធិការជាតិអូឡាំពិកកម្ពុជា ដឹកនាំដោយឯកឧត្តមបណ្ឌិត ថោង ខុន រួមជាមួយឯកឧត្តម ឃួង ស្រេង អមដំណើរដោយឯកឧត្តម អ៊ុក សិទ្ធជាតិ អគ្គនាយកកីឡាតំណាងឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ត្រូវចេញដំណើរទៅទីក្រុងឌូបៃ ប្រទេសអារ៉ាប់រួម។
បេសកកម្មនេះ ទទួលបានការឯកភាពដ៏ខ្ពង់ខ្ពស់ពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន តាមការស្នើសុំពី NOCC ដោយឯកឧត្តមបណ្ឌិត ថោង ខុន នឹងចុះហត្ថលេខាលើពិធីប្រគល់-ទទួលសិទ្ធិធ្វើជាម្ចាស់ផ្ទះការប្រកួតកីឡាយុវជនអូឡាំពិកអាស៊ី នាឆ្នាំ២០២៩ (ASIAN Youth Games) ដោយមានបណ្តាប្រទេសនានាចំនួន ៤៥ប្រទេសនៃទ្វីបអាស៊ី ដែលមានទំហំធំជាងការរៀបចំការប្រកួតកីឡាស៊ីហ្គេម ឆ្នាំ២០២៣ ដែលមានចន្លោះពី៣០ ទៅ៤០ប្រភេទកីឡា ប៉ុន្តែចំនួនប្រភេទកីឡាយុវជនអាស៊ីនេះ មានចន្លោះត្រឹម១០ ទៅ១៥ប្រភេទកីឡា ដោយយុវជនចន្លោះអាយុ១៥ ដល់១៧ឆ្នាំ។
ឯកឧត្តមអគ្គលេខាធិការបន្ថែមទៀតថា នេះជាកំណត់ត្រាប្រវត្តិសាស្ត្រថ្មីមួយ ដែលជាមោទនភាពរបស់ព្រះរាជាណាចក្រកម្ពុជា សម្រាប់ការទទួលរៀបចំធ្វើជាម្ចាស់ផ្ទះព្រឹត្តិការណ៍កីឡាអន្តរជាតិនេះ។«ដោយសារយើងរស់នៅក្នុងសន្តិភាពពេញលេញ និងការអភិវឌ្ឍសេដ្ឋកិច្ចសង្គម កាន់តែប្រសើរពីមួយឆ្នាំទៅមួយឆ្នាំ កម្ពុជាទទួលបានការគាំទ្រផ្តល់សិទ្ធិពីអន្តរជាតិ។ នៅក្នុងបេសកកម្មនេះ មានកម្មវិធីសំខាន់ៗ គឺគណៈប្រតិភូកម្ពុជានឹងចូលរួមមហាសន្និបាតលើកទី៤០ របស់ក្រុមប្រឹក្សាកីឡាអូឡាំពិកអាស៊ី។
ការចុះហត្ថលេខាទទួលសិទ្ធិធ្វើម្ចាស់ផ្ទះ ការប្រកួតកីឡាយុវជនអាស៊ី គឺធ្វើឡើងក្រោយទទួលបានការអនុញ្ញាតពីសម្តេចតេជោនាយករដ្ឋមន្ត្រី និងរាជរដ្ឋាភិបាលរួចហើយ។ ការដាក់បេក្ខភាពប្រកួតប្រជែងធ្វើម្ចាស់ផ្ទះនេះ មានបណ្តាប្រទេសមួយចំនួន បានចូលរួមប្រកួតប្រជែងដែរ ប៉ុន្តែដោយសារក្រុមប្រឹក្សាកីឡាអូឡាំពិកអាស៊ី បានមើលឃើញពីការរីកចម្រើននៃវិស័យកីឡាកម្ពុជា ជាពិសេសគឺការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការកសាងហេដ្ឋារចនាសម្ព័ន្ធកីឡា សម្រាប់ស៊ីហ្គេម ឆ្នាំ២០២៣ របស់កម្ពុជាផងនោះ ទើបធ្វើឲ្យការខិតខំទាំងអស់នេះ បានឆ្លើយតបទៅនឹងការទទួលរៀបចំព្រឹត្តិការណ៍ធំៗ ដូចជាព្រឹត្តិការណ៍យុវជនអាស៊ី ឆ្នាំ២០២៩ នេះជាដើម។
ហត្ថលេខី ដែលគ្រោងនឹងចុះហត្ថលេខា នៅទីក្រុងឌូបៃនេះ គឺឯកឧត្តមបណ្ឌិត ថោង ខុន ក្នុងនាមប្រធាន NOCC ដើម្បីទទួលបានសិទ្ធិធ្វើជាម្ចាស់ផ្ទះ នាឆ្នាំ២០២៩ ខាងមុខ។ រីឯឯកឧត្តម ឃួង ស្រេង នឹងចុះហត្ថលេខា ក្នុងនាមជាទីក្រុងម្ចាស់ផ្ទះ ដែលនេះគឺជាគោលការណ៍ច្បាប់នៃធម្មនុញ្ញរបស់គណៈកម្មាធិការអូឡាំពិកអន្តរជាតិ និងក្រុមប្រឹក្សាកីឡាអូឡាំពិកអាស៊ី។ នៅក្នុងបេសកកម្មនេះ គណៈប្រតិភូកម្ពុជា នឹងបំពេញទស្សនកិច្ចការតាំងពិពណ៌អន្តរជាតិ នៅទីក្រុងឌូបៃផងដែរ៕ប្រភពពី៖Cambodia SEA GAMES 2023