រាជធានីភ្នំពេញ ៖ តំណាងរាស្ត្រមណ្ឌលខេត្តព្រៃវែង លោក ជាម យៀប ដែលជាអតីតប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ត្រូវបានរដ្ឋសភា បោះឆ្នោតគាំទ្រជា អនុប្រធានទី១ នៃរដ្ឋសភា ក្រោយពីតំណែងនេះនៅចន្លោះបន្ទាប់ពីលោក ងួន ញ៉ិល ទទួលមរណភាពកាលពីពេលកន្លងទៅនេះ។
សូមជម្រាបថា នៅព្រឹកថ្ងៃទី២៥ ខែវិច្ឆិកា ឆ្នាំ២០២១ នេះរដ្ឋសភាជាតិ បានបើកកិច្ចប្រជុំពេញអង្គ ក្រោមអធិបតីភាព សម្តេចអគ្គមហាពញាចក្រី ហេង សំរិន ប្រធានរដ្ឋសភា ដោយមានការចូលរួមពីសមាជិករដ្ឋសភាចំនួន១០៦រូប ដែលមានរបៀបវារៈសំខាន់ៗសរុប៧។
យោងតាមការចុះផ្សាយរបស់សារពត៌មានក្នុងស្រុកបានឲ្យដឹងថា លោក ជាម យៀប កើតនៅឆ្នាំ១៩៤៦ នៅភូមិព្រែកចាម ឃុំបន្តិចប្រាសាទ ស្រុកពាមរក៍ខេត្តព្រៃវែង ដែលជាសមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា។ លោកបានបញ្ចប់ការសិក្សាថ្នាក់ឧត្តមសិក្សាផ្នែកប្រវត្តិ-ភូមិវិទ្យានៅភ្នំពេញឆ្នាំ១៩៧៤។ ក្រៅពីនោះ លោកបានបញ្ចប់ថ្នាក់បរិញ្ញាបត្រជាន់ខ្ពស់ផ្នែកច្បាប់ពាណិជ្ជកម្ម នៃសកលវិទ្យាល័យ «NCGU» នៃសហរដ្ឋអាមេរិក USA នៅឆ្នាំ២០០០, បញ្ចប់ថ្នាក់បណ្ឌិត Doctor Degree of Philosophy in Businesslaw Ph.D. ឆ្នាំ២០០៤, ជាប់ជាបណ្ឌិតរដ្ឋ ឆ្នាំ២០០៩ និងទទួលសញ្ញាបត្រថ្នាក់បណ្ឌិតមហាបរិញ្ញា ផ្នែកទស្សនៈវិជ្ជា វិទ្យាសាស្ត្រសេដ្ឋកិច្ច ឆ្នាំ២០១០។
លោក ជាម យៀប ក៏ធ្លាប់ក្លាយជាទាសករដាច់ថ្លៃនៃរបបខ្មែរក្រហមប៉ុលពត ដល់ឆ្នាំ១៩៧៧។ លោកធ្លាប់ជាសាស្ត្រាចារ្យនៅអនុវិទ្យាល័យកំពង់ត្របែក និងពាមរក៍ (ឆ្នាំ១៩៦៦-១៩៧០), ជានាយទាហានជាន់ខ្ពស់ក្នុងរបបលន់ ណុល(ឆ្នាំ១៩៧០-១៩៧៥), ជាអភិបាលខេត្តព្រៃវែង (ឆ្នាំ១៩៨០-១៩៨៧ ), ជាអនុរដ្ឋមន្ត្រីនៃក្រុមប្រឹក្សាគណៈរដ្ឋមន្ត្រី (ឆ្នាំ១៩៨៧-១៩៨៨), ជាអគ្គនាយកនៃអគ្គនាយកដ្ឋានទេសចរណ៍បុព្វសិទ្ធឋានៈស្មើរដ្ឋមន្ត្រី (ឆ្នាំ១៩៨៨-១៩៩៣), លោកជាប់ឆ្នោតជាតំណាងរាស្ត្រមណ្ឌលខេត្តព្រៃវែងរបស់គណបក្ស ប្រជាជនកម្ពុជា ក្នុងសម័យសាធារណរដ្ឋប្រជាមានិតកម្ពុជា (ឆ្នាំ១៩៨១ដល់ឆ្នាំ១៩៩៣) និងបានជាប់ឆ្នោតជាតំណាងរាស្ត្រមណ្ឌលព្រៃវែង និងជាសមាជិកគណៈកម្មាធិការអចិន្ត្រៃយ៍នៃរដ្ឋសភារបស់គណបក្សប្រជាជនកម្ពុជា( ឆ្នាំ១៩៩៣ មកដល់បច្ចុប្បន្ន)៕