ចូលដល់ថ្ងៃទី២ នៃដំណើរបេសកកម្មចុងសប្តាហ៍ចុះមូលដ្ឋានស្រុកកំពង់សៀម ខេត្តកំពង់ចាមរបស់លោកវេង សាខុន ប្រធានក្រុមការងាររាជរដ្ឋាភិបាលចុះមូលដ្ឋានស្រុកតំបែរ ខេត្តត្បូង ឃ្មុំ ស្រុកកំពង់សៀម និងស្រុកជើងព្រៃ ខេត្តកំពង់ចាម និងសហការីដែលជាអនុប្រធានក្រុមការ ងារចុះមូលដ្ឋានស្រុកកំពង់សៀម និងជាប្រធានក្រុមការងារចុះជួយឃុំហាន់ជ័យ។
បេសកកម្មនេះមានគោលបំណងដើម្បីជួបសំណេះសំណាលជាមួយប្រជាពលរដ្ឋ សាកសួរសុខទុក្ខបងប្អូនបន្ទាប់ពីស្ថានភាពជំងឺឆ្លងកូវីដ-១៩ បានធូស្បើយល្អប្រសើរដូចប្រក្រតីវិញ និងជាពិសេសនោះគឺចុះមកពិនិត្យ តាមដាន និងវាយតម្លៃ លើសកម្មភាពត្រៀមរៀបចំបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នៅថ្ងៃទី៥ ខែមិថុនា ឆ្នាំ២០២២។
សម្រាប់កម្មវិធីទី១ នៅព្រឹកថ្ងៃអាទិត្យ ១៥រោច ខែចេត្រ ឆ្នាំខាល ចត្វាស័ក ព.ស. ២៥៦៥ ត្រូវនឹងថ្ងៃទី០១ ខែឧសភា ឆ្នាំ២០២២ ក្នុងបរិវេណវត្តមនីរតន: ហៅវត្តក្រូចសើច លោកប្រធានក្រុមការងាររាជរដ្ឋាភិបាល បានអញ្ជើញជាអធិបតីក្នុងពិធីសំណេះសំណាលជាមួយសមាជិកបក្សចំនួន ១ ១៥០នាក់ អញ្ជើញមកពីឃុំហាន់ជ័យ។ ក្នុងពិធីនេះក៏មានវត្តមានអញ្ជើញចូលរួមពីសំណាក់លោកអនុប្រធានក្រុមការងារចុះស្រុកកំពង់សៀម លោកប្រធាន អនុប្រធាន និងសមាជិកក្រុមការងារចុះជួយឃុំហាន់ជ័យ លោកអភិបាលស្រុក មេឃុំ សមាជិកក្រុមប្រឹក្សាស្រុក ឃុំ ភូមិ កងកំលាំងប្រដាប់អាវុធ និងបងប្អូនជាប្រជាពលរដ្ឋយ៉ាងច្រើនកុះករ។
បន្ទាប់ពីបានជ្រាបអំពីរបាយការណ៍របស់លោកមេឃុំហាន់ជ័យ ដែលបានលើកយកមកជម្រាបជូនអង្គពិធីយ៉ាងក្បោះក្បាយអំពីបច្ចុប្បន្នភាពនៃការរីករាលដាលជំងឺកូវីដ-១៩ បានផ្តល់សេវាសាធារណ:ជូនប្រជាពលរដ្ឋ ការទទួលបានគោលនយោបាយ ក៣ និងភូមិ ឃុំមានសុវត្ថិភាព និងជារួមសកម្មភាពរបស់សង្គមចាប់ផ្តើមដំណើរការដូចប្រក្រតីឡើងវិញ។ សកម្មភាពចុះមូលដ្ឋានរបស់ក្រុមការងារថ្នាក់ជាតិដើម្បីជួយដោះស្រាយបញ្ហាប្រឈមសំខាន់ៗរបស់បងប្អូនប្រជាពលរដ្ឋក្នុងឃុំ និងការត្រៀមលក្ខណ:សម្បត្តិគ្រប់បែបយ៉ាងដើម្បីចូលរួមប្រកួតប្រជែងធ្វើការបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលខាងមុខ។
លោកវេង សាខុនប្រធានក្រុមការងារបានកោត សរសើរ និងវាយតម្លៃខ្ពស់លើសមិទ្ធផលដែលក្រុមការងាររាជរដ្ឋាភិបាលចុះជួយឃុំហាន់ជ័យ សហការជាមួយអាជ្ញាធរមូលដ្ឋានគ្រប់លំដាប់ថ្នាក់បានអនុវត្តដើម្បីអភិវឌ្ឍមូលដ្ឋាន ស្គាល់សុខ ស្គាល់ទុក្ខ និងទទួលដឹង ឭនូវរាល់បញ្ហានានារបស់បងប្អូនប្រជាពលរដ្ឋ ហើយបានដោះស្រាយជូនជាបន្តបន្ទាប់តាមការចាំបាច់ និងតម្រូវការជាក់ស្តែង។
បច្ចុប្បន្នកម្ពុជាកំពុងត្រៀមរៀបចំធ្វើការបោះឆ្នោតជ្រើសរើសក្រុមប្រឹក្សាឃុំ សង្កាត់សម្រាប់អាណត្តិទី៥ នៅថ្ងៃទី៥ ខែមិថុនា ខាងមុខ លោកប្រធានក្រុមការងារបានគាំទ្រ លើកទឹកចិត្ត និងណែនាំបន្ថែមដល់សមាជិកក្រុមការងារចុះជួយឃុំហាន់ជ័យ អាជ្ញាធរស្រុក ឃុំ ត្រូវបង្កើនការយកចិត្តទុក ដាក់ត្រៀមរៀបចំយុទ្ធនាការឃោសនាបោះឆ្នោតទាំងបញ្ជីឈ្មោះចាស់ ថ្មី ស្លាកគណបក្ស រូបថត មធ្យោបាយធ្វើដំណើរ និងក្តាប់ឲ្យបាននូវសកម្មភាពគណបក្សផ្សេងៗ និងអញ្ជើញបងប្អូនប្រជា ពលរដ្ឋទៅចូលរួមបោះឆ្នោតបានគ្រប់ៗគ្នា បោះឆ្នោតជូនគណ:បក្សប្រជាជនកម្ពុជា គឺដើម្បីសុខសន្តិភាព និងការអភិវឌ្ឍប្រកបដោយនិរន្តរភាព។ ប្រក្រតីភាពសង្គមរបស់យើងបានចាប់ផ្តើមដំណើរការឡើងវិញ ហេតុនេះយើងត្រូវរូតរះចាប់កាន់ការងារជាអាជីពដើម្បីស្តារសេដ្ឋកិច្ចគ្រួសារឡើងវិញ។ ដោយឡែក ឱពុកម្តាយ និងអាណាព្យាបាលត្រូវលើកទឹកចិត្តឲ្យកូន ចៅឲ្យទៅសិក្សារៀនសូត្របានទៀងទាត់តាមកម្មវិធីសាលាដើម្បីចៀសឲ្យផុតពីអនក្ខរភាព ជាទំពាំងស្នងឬស្សីដ៏ល្អ និងចៀសឲ្យផុតពីភាពក្រីក្រ និងត្រូវខិតខំយកចិត្តទុកដាក់ថែរក្សាសុខភាពឲ្យបានល្អ សុខភាពល្អ សេដ្ឋកិច្ចគ្រួសារប្រសើរ និងមានសុភមង្គល៕
