គៀវ៖ ប្រធានគណៈកម្មការអឺរ៉ុប លោកស្រី Ursula von der Leyen បាននិយាយ កាលពីថ្ងៃអង្គារថា សហភាពអឺរ៉ុប កំពុងរៀបចំផែនការដាក់ទណ្ឌកម្មថ្មីលើប្រទេសបេឡារុស្ស ជុំវិញកិច្ចសហប្រតិបត្តិការយោធារបស់ខ្លួនជាមួយរុស្ស៊ី ស្របពេលជម្លោះនៅអ៊ុយក្រែន កំពុងបន្ត។
ថ្លែងបន្ទាប់ពីការចុះហត្ថលេខាលើកិច្ចព្រមព្រៀងសហប្រតិបត្តិការ NATO-EU ថ្មី លោកស្រី von der Leyen បានលើកឡើងថា ទីក្រុងប្រ៊ុចសែល កំពុងរៀបចំការដាក់ទណ្ឌកម្មប្រឆាំងនឹងប្រទេសនានាដែលគាំទ្រទីក្រុងមូស្គូ ក្នុងផ្នែកយោធា ដោយសង្កត់ធ្ងន់ជាពិសេសទៅលើបេឡារុស្ស និងអ៊ីរ៉ង់។
លោកស្រី បានបន្ថែមថា យើងនឹងរក្សាសម្ពាធលើវិមានក្រឹមឡាំង ឱ្យបានយូរ ដរាបណាទណ្ឌកម្មនឹងជះឥទ្ធិពលខ្លាំង ហើយយើងក៏នឹងពង្រីកការដាក់ទណ្ឌកម្មទាំងនេះចំពោះប្រទេសដែលគាំទ្រផ្នែកយោធានៃសង្គ្រាមជាមួយរុស្ស៊ី ផងដែរ៕