បន្ទាយមានជ័យ ៖ នៅព្រឹកថ្ងៃទី២៥ ខែមករា ឆ្នាំ២០២៣ នេះ រដ្ឋបាលក្រុងប៉ោយប៉ែត បានរៀបចំ ពិធី ជួបសំណេះសំណាលជា មួយ ប្រជាពលរដ្ឋ ជនវ័យចាស់ ចំនួន៥៥គ្រួសារ មកពីសង្កាត់ទាំង៥ ក្នុងក្រុងប៉ោយប៉ែត ខេត្តបន្ទាយមានជ័យ ។
ពិធីជួបសំណេះសំណាល ជាមួយលោកតាលោកយាយ នៅ ក្នុងបរិវេណ សាលាក្រុងប៉ោយប៉ែត ដឹកនាំដោយ លោក គាត ហ៊ុល អភិបាលក្រុងប៉ោយប៉ែត និងមាន ការអញ្ជើញចូលរួម ពី សំណាក់ លោក អភិបាលរង លោកនាយក នាយរង រដ្ឋបាលក្រុង ប្រធាន អនុប្រធាន ការិយាល័យ និងក្រុមការងារ សង្កាត់ ភូមិ ជាច្រើនរូបផងដែរ ។
នៅក្នុងឱកាសនោះ លោក គាត ហ៊ុល អភិបាលក្រុងប៉ោយប៉ែត ក៏បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ឯកឧត្តមប្រធានសមាគមមនុស្សចាស់ និងលោកជំទាវដែលជានិច្ចកាលតែងតែគិតគូ ពីការរស់នៅសុខទុក្ខរបស់បងប្អូនប្រជាពលរដ្ឋ ជាពិសេសជនចាស់ជរានៅក្នុងមូលដ្ឋាន ។
លោក គាត ហ៊ុល អភិបាលក្រុងប៉ោយប៉ែត បានកោតសសើរដល់ អ្នកពាក់ព័ន្ធទាំងអស់ដែលយកចិត្តទុកដាក់និងសូមបន្តតាមដានសុខភាព និងតម្រូវការចាំបាច់នានារបស់មនុស្សវ័យចាស់ ពិសេសស្ថានភាពរដូវត្រជាក់នេះ ។
លោកបានថ្លែងបន្តទៀតថា ៖ការលើកកម្ពស់គុណភាព ជីវិតរបស់ មនុស្សចាស់ការយកចិត្តទុកដាក់ធានាសុខុ មាលភាព ដល់មនុស្សចាស់ ជាបំណងប្រាថ្នារបស់ប្រជាពលរដ្ឋកម្ពុជា ។ ជាពិសេសនៅក្នុងមូលដ្ឋានក្រុងប៉ោយប៉ែត យើង ថ្នាក់ដឹកនាំ លោកបាននិងកំពុង បង្កើត ធនាគារ ហិរញ្ញវត្ថុ មួយ ក្នុងគោលបំណង ជួយដល់ប្រជាពលរដ្ឋ វ័យចំណាស់ ដែលមានជីវភាព ខ្វះខាតខ្លាំង កម្ចីដោយគ្មាន ការប្រាក់ ផងដែរ។
សូមបញ្ជាក់ថា អំណោយ ឯកឧត្ដម ឧបនាយករដ្ឋមន្ត្រី កែ គឹមយ៉ាន ដែលលោកអភិបាលក្រុងប៉ោយប៉ែត នាំយកមកចែកជូនដល់លោកតាលោកយាយរួមមាន សម្ភារៈ អង្ករ . មី អាវរងារ រួមជាមួយថវិកា មួយចំនួនផងដែរ ៕