កីឡា ៖ លោក Zinedine Zidane ត្រូវបានគេរាយការណ៍ថានឹងត្រៀមខ្លួនដើម្បីពិចារណាតែក្លឹបចំនួន៣ ប៉ុណ្ណោះសម្រាប់ការវិលត្រឡប់របស់លោកទៅកាន់តំណែងអ្នកចាត់ការវិញ។
បុរសវ័យ៥០ឆ្នាំរូបនេះបានអវត្តមានពីការងារចាប់តាំងពីចាកចេញពីតំណែងរបស់លោកនៅ Real Madrid ក្នុងខែមីនាឆ្នាំ២០២១ បន្ទាប់ពីការប្រកបទី២របស់លោកជាគ្រូបង្វឹករបស់ក្លឹប។
ចាប់តាំងពីចាកចេញពី Real Madrid ក្នុងឆ្នាំ ២០២១លោក Zidane ត្រូវបានផ្សារភ្ជាប់ជាមួយនឹងក្លឹប Paris Saint-Germain, Juventus និង Manchester United ប៉ុន្តែមានការលើកឡើងថាលោកកំពុងរង់ចាំតំណែងគ្រូបង្វឹកក្រុមជម្រើសជាតិបារាំង។
ទោះបីជាយ៉ាងណាក៏ដោយ បន្ទាប់ពីដឹកនាំបារាំងទៅកាន់វគ្គផ្តាច់ព្រ័ត្រ World Cup ជាប់ៗគ្នា កិច្ចសន្យារបស់លោក Didier Deschamps ត្រូវបានបន្តរហូតដល់រដូវក្តៅឆ្នាំ ២០២៦ ដែលបញ្ចប់ក្តីសង្ឃឹមរបស់លោក Zidane ក្នុងការក្លាយជាគ្រូបង្វឹកជម្រើសជាតិបារាំងនាពេលខាងមុខ។
ថ្មីៗនេះ Zidane ត្រូវបានផ្សារភ្ជាប់ជាមួយនឹងមុខតំណែងអ្នកចាត់ការទូទៅរបស់ក្រុមជម្រើសជាតិប្រេស៊ីល និងសហរដ្ឋអាមេរិក ប៉ុន្តែគាត់ចាប់អារម្មណ៍ត្រឹមតែតួនាទីនៅក្លិបចំនួន៣ប៉ុណ្ណោះ។
យោងតាមសារព័ត៌មាន The Athletic បានឲ្យដឹងថាលោក Zidane នឹងបើកចំហរក្នុងការដឹកនាំ Juventus, Marseille ឬត្រលប់មកវិញសម្រាប់អាជីពលើកទី៣ក្នុងនាមជាគ្រូបង្វឹក Real Madrid ៕
