នៅរសៀលថ្ងៃទី២២ ខែមីនា ឆ្នាំ២០២៣ នេះសមត្ថកិច្ចបានបញ្ជូនលោក យឹម ស៊ីណន និងលោក ហ៊ុន កុសលអតីតសកម្មជនក្រុមប្រឆាំងទៅកាន់សាលាដំបូងរាជធានីភ្នំពេញ ដើម្បីបន្តនីតិវិធីពាក់ពន្ធ័បទញុះញង់ និងប្រមាថអង្គព្រះមហាក្សត្រ។
សូមជម្រាបថា ការឃាត់ខ្លួនជនទាំងពីរខាងលើ ត្រូវបានធ្វើឡើងកាលពីល្ងាចថ្ងៃទី២១ ខែមីនា ឆ្នាំ២០២៣ ដោយកម្លាំងស្នងការដ្ឋាននគរបាលរាជធានីភ្នំពេញ បន្ទាប់ពីជនទាំងពីរបានបង្ហោះសារបែបញុះញង់តាមបណ្តាញសង្គមពាក់ព័ន្ធនឹងរូបភាព ព្រះមហាក្សត្រ ព្រះរាជទានព្រះអគ្គីជ័យកីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នៅខេត្តសៀមរាប នាថ្ងៃទី២១ ខែមីនា ឆ្នាំ២០២៣។
គួររម្លឹកថា មុនឈានដល់ការចាប់ខ្លួន លោក យឹម ស៊ីណន បានបង្ហោះនៅលើហ្វេសប៊ុករបស់លោកដូច្នេះថា៖ «បើតាមសំលេងពលរដ្ឋតាមហាង កាហ្វេ៖ ថ្ងៃនេះយើងអាច ឃើញច្បាស់ថានរណាជាស្តេច ផែនដីពិតប្រាកដ»។
ចំណែកលោក ហ៊ុន កុសល ក៏បានបង្ហោះដែរថា៖ «ឃើញពួកគេធ្វើបាបព្រះទ័យ នឹងបន្ទាបព្រះចេស្តាព្រះមហាក្សត្រខ្មែរគ្រប់ ច្រកបែបនេះ។ ទូលបង្គំជាអ្នកនយោបាយជំនាន់ក្រោយប្តេជ្ញានឹងប្រើសមត្ថភាពដែលមានទាំងប៉ុន្មានចូលរួមពូនផ្តុំជាមួយលោកប្រធាន កឹម សុខា ការពារព្រះចេស្ដាក្សត្រ និងព្រះរាជបល្ល័ង្កដែលប្រជារាស្ត្រខ្មែរមិនអាចខ្វះបាន»។
តាមអ្នកវិភាគនយោបាយនិងអ្នកច្បាប់បានលើកទ្បើងថា ខ្លឹមសារនៃការបង្ហោះសាររបស់សកម្មជនបក្សប្រឆាំងទាំងពីរបានបង្ហាញនូវចរិកញុះញង់និងប្រមាថយ៉ាងធ្ងន់ធ្ងរដល់អង្គព្រះមហាក្សត្រ ហើយវាគ្រប់គ្រាន់តាមផ្លូវច្បាប់ដើម្បីធ្វើការចាប់ខ្លួនជនទាំងពីររូបនេះយកទៅផ្តន្ទាទោស៕
