សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានទទួលជួបសវនាការជាមួយ ឯកឧត្តម ដាតុ ស៊េរី អាន់វ៉ា ប៊ីន អ៊ីប្រាហ៊ីម (Dato’ Seri Anwar bin Ibrahim) នាយករដ្ឋមន្ត្រី នៃប្រទេស ម៉ាឡេស៊ីនៅរសៀលថ្ងៃចន្ទ ទី២៧ ខែមីនា ឆ្នាំ២០២៣នេះ នៅវិមានរដ្ឋសភា ខណៈដែលឯកឧត្តមបានដឹកនាំគណៈប្រតិភូជាន់ខ្ពស់បំពេញទស្សនកិច្ចផ្លូវការ និងមិត្តភាពនៅកម្ពុជា។
ក្នុងនាមរដ្ឋសភាកម្ពុជា សម្តេច ហេង សំរិន បានបង្ហាញនូវក្តីសោមនស្សរីករាយ និងបានស្វាគមន៍យ៉ាងកក់ក្ដៅ ចំពោះ ឯកឧត្តមនាយករដ្ឋមន្ត្រី និងគណៈប្រតិភូទាំងអស់។ សម្តេចប្រធានរដ្ឋសភាមាន ប្រសាសន៍ថាដំណើរទស្សនកិច្ចផ្លូវការរបស់ ឯកឧត្តមនាយករដ្ឋមន្ត្រី នាពេលនេះ នឹងរួមចំណែកបន្ថែមទៀត ក្នុងការបន្តពូនជ្រុំ លើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការ ដ៏ល្អរវាងប្រជាជាតិទាំងពីរ ដែលមានជាង៦ទសវត្សមកនេះ ឱ្យកាន់តែរឹងមាំខ្លាំងក្លាថែមទៀត។
ឯកឧត្តម ដាតុ ស៊េរី អាន់វ៉ា ប៊ីន អ៊ីប្រាហ៊ីម បានថ្លែងអំណរគុណចំពោះសម្តេចប្រធានរដ្ឋសភា ដែលបានទទួលស្វាគមន៍ និងបដិសណ្ឋារកិច្ចយ៉ាងកក់ក្តៅដល់គណៈប្រតិភូ។ ឯកឧត្តមបានគូស បញ្ជាក់ថាដំណើរទស្សនកិច្ចរបស់ឯកឧត្តមនាពេលនេះ នឹងចូលរួមចំណែកដល់ការពង្រឹងពង្រីក កិច្ចសហប្រតិបត្តិការប្រទេសទាំងពីរ ទាំងខាងស្ថាប័ននីតិប្បញ្ញត្តិ និងនីតិប្រតិបត្តិ។
សម្តេចប្រធានរដ្ឋសភា ក៏បានសម្តែងនូវក្តីរីករាយក្រៃលែងដោយ សងេ្កតឃើញថា រាជរដ្ឋាភិបាលនៃប្រទេសទាំងពីរ មានកិច្ចសហប្រតិបត្តិការយ៉ាងល្អ ទាំងក្របខ័ណ្ឌទ្វេភាគី ក៏ដូចជាក្នុងក្របខណ្ឌតំបន់ និងអន្តរជាតិ ។ ដោយឡែក ស្ថាប័ននីតិប្បញ្ញត្តិនៃប្រទេសទាំងពីរ ក៏បានធ្វើកិច្ចសហប្រតិបត្តិការជាមួយគ្នាយ៉ាងច្រើនក្នុងក្របខណ្ឌទ្វេភាគី និងពហុភាគីផងដែរ ។
សម្តេចបន្តថា ក្រៅពីកិច្ចសហប្រតិបត្តិការក្នុងក្របខណ្ឌ ក្រុមមិត្តភាពរដ្ឋសភា ដើម្បីផ្លាស់ប្តូរបទពិសោធន៍លើការងារនីតិកម្ម រដ្ឋសភាទាំងពីរក៏បានគាំទ្រគ្នាទៅវិញទៅមក លើវេទិកាអន្តរសភានានាទាំងក្នុងតំបន់ និងសកលលោក។
សម្តេចប្រធានរដ្ឋសភា បានថ្លែង អំណរគុណដល់ រដ្ឋាភិបាល និងប្រជាជនម៉ាឡេស៊ី ដែលបានរួមចំណែកក្នុងដំណើរការស្វែងរកសន្តិភាព និងការអភិវឌ្ឍនៅកម្ពុជា ។
តាមរយៈឯកឧត្តម នាយករដ្ឋមន្ត្រី សម្តេចបានផ្តាំផ្ញើសាកសួរសុខទុក្ខថ្នាក់ដឹកនាំសភាម៉ាឡេស៊ីទាំងអស់ ហើយបានបញ្ជាក់ថា រដ្ឋសភាកម្ពុជាត្រៀមធ្វើកិច្ចសហប្រតិបត្តិការជិតស្និទ្ធជាមួយសភាម៉ាឡេស៊ី៕
