កីឡា ៖ ការចាប់ពូលវិញ្ញាសារបាល់ទាត់បុរស-នារី ក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ នឹងធ្វើឡើងនៅថ្ងៃទី៥ ខែមេសា នេះនៅសាលសន្និសីទសារព័ត៌មាននៃពហុកីឡដ្ឋានជាតិមរតកតេជោ។
ព្រឹត្តិការណ៍នេះមានក្រុមចូលរួមសរុបចំនួន ១០ក្រុម រួមមាន៖ ម្ចាស់ផ្ទះកម្ពុជា សិង្ហបុរី មីយ៉ាន់ម៉ា ថៃ ម៉ាឡេស៊ី ទីម័រខាងកើត ឥណ្ឌូណេស៊ី វៀតណាម ឡាវ និង ហ្វីលីពីន។ ក្រុមទាំងអស់ នឹងត្រូវបែងជាពីរពូល ក្នុងមួយពូលមាន ៥ក្រុម។
សម្រាប់ការចាប់ឆ្នោតបែងចែកពូលនេះក្រុមម្ចាស់ផ្ទះកម្ពុជា ស្ថិតនៅ Pot1 ជាមួយវៀតណា ខណៈ Pot 2 មាន ឥណ្ឌូនេស៊ី និង ថៃ ។ ចំណែក Pot 3 មាន មីយ៉ាន់ម៉ា និង ម៉ាឡេស៊ី និង Pot 4 មាន សិង្ហបុរី ឡាវ ហ្វីលីពីន និងទីម័រខាងកើត។
សូមជម្រាបថា វិញ្ញាសាបាល់ទាត់បុរស នឹងចាប់ផ្ដើមប្រកួតនៅថ្ងៃទី២៩ ខែមេសា ឆ្នាំ២០២៣ ដែលជាវិញ្ញាសាមួយត្រូវចាប់ផ្ដើមប្រកួតមុនគេនៅក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ៕
