កីឡា ៖ ក្លិបបាល់ទាត់ Atletico Madrid នឹងគ្មានវត្តមានខ្សែប្រយុទ្ធអន្តរជាតិអេស្ប៉ាញ Alvaro Morata ហោចណាស់ ៣សប្តាហ៍ បន្ទាប់ពីលោកបានបង្ខំចិត្តចាកចេញពីទីលាន ក្នុងពេលប្រកួតចាញ់ក្លិប Sevilla ១-០ កាលពីថ្ងៃអាទិត្យកន្លងទៅ ដោយសារមានរបួសជង្គង់។
ខ្សែប្រយុទ្ធរូបនេះ បានដួលលើទីលាន បន្ទាប់ពីប្រជែងគ្នានៅចុងតង់ទី១ ហើយត្រូវបានគ្រាចេញពីទីលាន ដោយត្រូវបានគេមើលឃើញថាបានយំ ដោយភាពឈឺចាប់នៃរបួស។ ការត្រួតពិនិត្យបន្ថែម បានបង្ហាញថា កីឡាករ Morata បានរងរបួសសរសៃចងជង្គង់ផ្នែកខាងក្នុង ហើយលោកនឹងត្រូវអវត្តមាន យ៉ាងហោចណាស់ក៏ ៣សប្តាហ៍ដែរ។
ការអវត្តមាននេះមានន័យថា ខ្សែប្រយុទ្ធរូបនេះ នឹងខកខានការប្រកួតវគ្គ ១៦ក្រុមចុងក្រោយ Champions League ទល់នឹង Inter Milan, ខកខានការប្រកួតជើងទី២ នៃវគ្គពាក់កណ្តាលផ្តាច់ព្រ័ត្រ Copa del Rey នៅក្រៅទឹកដីទល់នឹងក្លិប Athletic Bilbao និងខកខានការប្រកួតក្នុងលីគ La Liga ទល់នឹងក្លិប Las Palmas, Almeria, Betis, Cadiz និងក្លិប FC Barcelona ទៀតដែរ៕
