ខេត្តរតនគិរី ៖ យោងតាមហ្វេសប៊ុក”ផេក”របស់សាលាដំបូងខេត្តរតនគិរីចេញសេចក្តីប្រកាសព័ត៌មាននៅល្ងាចថ្ងៃទី២០កុម្ភៈនេះ ថា ស្តីពីការផ្ដន្ទាទោសជនជាប់ចោទពាក់ព័ន្ធនឹងករណីគ្រឿងញៀន អ្នកនាំពាក្យសាលាដំបូងខេត្តរតនគិរី មានកិត្តិយសសូមជម្រាបជូនសាធារណជនជ្រាបថា« ក្រុមប្រឹក្សា ជំនុំជម្រះនៃសាលាដំបូងខេត្តរតនគិរី បានបើកសវនាការជំនុំជម្រះ នៅថ្ងៃទី២៥ ខែតុលា ឆ្នាំ២០២៣ និងនៅថ្ងៃទី២៧ ខែធ្នូ ឆ្នាំ២០២៣ លើសំណុំរឿងព្រហ្មទណ្ឌលេខ ១៦៨ ចុះថ្ងៃទី៤ ខែមេសា ឆ្នាំ២០២៣ ពាក់ព័ន្ឋនឹងបទល្មើសគ្រឿងញៀន។
ដែលមានសារធាតុញៀនជាមេតំហ្វេតាមីន មានបរិមាណសុទ្ឋ ៨១,១០% (ប៉ែតសិបមួយក្បៀសដប់) ភាគរយ ស្មើនឹង ២៤០,៧៣(ពីររយសសិបក្បៀសចិតសិបបី)ក្រាម។ ក្រោយពីបានពិភាក្សាដេញដោលលើជនជាប់ចោទ ភាគីពាក់ព័ន្ធពិនិត្យភស្តុតាង ផ្ទៀងផ្ទាត់អង្គហេតុ និង អង្គច្បាប់ចប់សព្វគ្រប់រកឃើញថាមានពិរុទ្ធភាព ហេតុនេះក្រុមប្រឹក្សាជំនុំជម្រះនៃសាលាដំបូងខេត្តរតនគិរី។
នៅថ្ងៃទី២០ ខែកុម្ភៈ ឆ្នាំ២០២៤ បានប្រកាសសាលក្រមព្រហ្មទណ្ឌលេខ ១៧ “ឃ” ក្រ២ ចុះថ្ងៃទី២០ ខែកុម្ភៈ ឆ្នាំ២០២៤ ដោយសម្រេចផ្តន្ទាទោសលើជនជាប់ចោទឈ្មោះ លឹម សំខាន់ ភេទប្រុស អាយុ៤០ឆ្នាំ សញ្ជាតិខ្មែរ ដាក់ពន្ឋនាគារកំណត់រយៈពេល២៨ (ម្ភៃប្រាំបី)ឆ្នាំ និងពិន័យជាប្រាក់ចំនួន ៦០.០០០.០០០(ហុកសិបលាន)រៀល ពីបទ “រក្សាទុក ជួញដូរ និងប្រើប្រាស់ដោយខុសច្បាប់នួវសារធាតុញៀន”។
តាមបញ្ញត្តិមាត្រា ៤០ កថាខណ្ឌ ១ កថាខណ្ឌ ៣ កថាខណ្ឌ ៧ ចំណុចទី ៤ និងមាត្រា ៤៥ នៃច្បាប់ស្ដីពីការត្រួតពិនិត្យគ្រឿងញៀន។ ចំពោះវត្ថុចាប់យកសារធាតុញៀនជាមេតំហ្វេតាមីន និងសម្ភារពាក់ព័ន្ធនឹងបទល្មើសត្រូវបានសម្រេច រឹបអូសស្រមតាមនិតិវិធីច្បាប់៕