ក្លិបអ្នកកាសែតកម្ពុជា (ក.អ.ក) នៅព្រឹកថ្ងៃទី២ ខែមេសា ឆ្នាំ២០២៤ នេះបានរៀបចំសន្និសីទសារព័ត៌មានស្តីពី “ជំនួយសង្គមសម្រាប់គ្រួសារមានបណ្ណសមធម៌”ដោយមានវាគ្មិនតំណាងមកពីក្រសួង ស្ថាប័នពាក់ពន្ធ័ចំនួន៣ មកបកស្រាយ និងពន្យល់អ្វីដែលទាក់ទងនឹងជំនួយសង្គម។
វេទិកាដ៏មានសារសំខាន់នោះ មានអ្នកសារព័ត៌មានជាតិ និងអន្តរជាតិចំនួន៦៨នាក់មកពី៤៨អង្គភាពចូលរួម។
យោងតាមរបាយការណ៍ក្រសួងជំនាញបានឲ្យដឹងថា បច្ចុប្បន្នមានប្រជាពលរដ្ឋក្នុងទូទាំងប្រទេសប្រមាណ៨០ម៉ឺនគ្រួសារ(ប្រមាណ៣លាន៥សែននាក់) បានទទួលបណ្ណសមធម៌ ហើយរហូតមកទល់ពេលនេះ រាជរដ្ឋាភិបាលកម្ពុជាបានចំណាយថវិកាជាតិប្រមាណ១,៣៣១លានដុល្លារអាម៉េរិក រ៉ាប់រងលើជំនួយសង្គម ចាប់តាំងជំងឺកូវីដ១៩បានផ្ទុះឡើងនាពាក់កណ្តាលឆ្នាំ២០២០មក ៕
