កីឡា ៖ គិតត្រឹមព្រឹកថ្ងៃទី ០៣ ខែមេសា ឆ្នាំ២០២៤នេះ កម្ពុជាបានទទួលភ្ញៀវជាតិ និង អន្តរជាតិប្រមាណ ៣៥ប្រទេស បានចុះរួចរាល់ក្នុងព្រឹត្តិការណ៍រត់ប្រណាំងអន្ដរជាតិពាក់កណ្ដាលម៉ារ៉ាតុងអន្តរជាតិលើកទី៩ ក្រុងព្រះសីហនុ ដែលនឹងចាប់ផ្ដើមនាថ្ងៃទី ៧ ខែមេសា ឆ្នាំ២០២៤ ក្នុងសប្ដាហ៍នេះ។
បើតាមលោក សែម ផល្លា នាយកប្រតិបត្តិរៀបចំទិវាម៉ារ៉ាតុង និងពាក់កណ្តាលម៉ារ៉ាតុងនៅកម្ពុជាបានឱ្យដឹងថា គិតត្រឹមព្រឹកនេះ មានអ្នកចុះឈ្មោះបានជាង១៤០០នាក់ ក្នុងនោះមានប្រជាជនកម្ពុជា១១៥០នាក់ និង ជនបរទេស២៥០នាក់ មកពី៣៥ប្រទេសជុំវិញពិភពលោក ។
លោកបន្តថា៖ ទីតាំងចាប់ផ្តើម និងទីផ្តាច់ព្រ័ត្រគឺនៅឆ្នេរសមុទ្រអូរឈើទាល។ ឆ្នាំនេះមាន៤វិញ្ញាសាគឺ២១គីឡូម៉ែត្រ ១០គីឡូម៉ែត្រ ៥គីឡូម៉ែត្រ និង៣គីឡូម៉ែត្រ។ ជាពិសេស ការរត់ឆ្លងកាត់រូបសំណាក់តោពីរ ហើយសម្រាប់ចម្ងាយ២១គីឡូម៉ែត្ររត់តាមបណ្តោយឆ្នេរសមុទ្រឆ្ពោះរហូតទៅដល់ដើមឈើចាំស្នេហ៍ទើបត្រឡប់វិញ»។
គួបញ្ជាក់ផងដែរថា៖ «ផ្លូវរត់តាមបណ្ដោយឆ្នេរនៃក្រុងព្រះសីហនុ គឺស្រស់ស្អាតខ្លាំងពិសេសក្រោយការជួសជុល និងសាងសង់ហេដ្ឋារចនាសម្ព័ន្ធជាច្រើនរបស់រាជរដ្ឋាភិបាលបើធៀបព្រឹត្តិការណ៍កីឡាបណ្ដាប្រទេសក្នុងតំបន់មិនទាន់មានផ្លូវរត់តាមឆ្នេរស្អាតបែបនេះឡើយ៕ ប្រភពពី៖Olympiccambodia.com
