ហ្វីលីពីន ៖ រដ្ឋាភិបាលបាននិយាយនៅថ្ងៃព្រហស្បតិ៍នេះថាចំនួនអ្នកស្លាប់ដោយសារព្យុះត្រូពិចដ៏ខ្លាំងក្លា Kompasu បានកើនឡើងដល់ ១៩ នាក់ហើយមនុស្ស ១៣ នាក់នៅតែបន្តបាត់ខ្លួន។នេះបើយោងតាមប្រភពពីសារព័ត៌មានស៊ិមហួរ។
ក្រុមប្រឹក្សាកាត់បន្ថយនិងគ្រប់គ្រងគ្រោះមហន្តរាយជាតិបាននិយាយថាចំនួនអ្នកស្លាប់អាចកើនឡើងដល់ ៣០ នាក់ ខណៈខ្លួនកំពុងផ្ទៀងផ្ទាត់របាយការណ៍អំពីការស្លាប់មនុស្ស ១១ នាក់ផ្សេងទៀតនិងម្នាក់ទៀតបាត់ខ្លួន ដោយសារការរអិលបាក់ដីនិងទឹកជំនន់ នៅតំបន់ភាគខាងជើងប្រទេសហ្វីលីពីននិងខេត្ត Palawan។
ព្យុះត្រូពិកនេះ បាក់បក់នៅ ប្រទេសហ្វីលីពីនកាលពូថ្ងៃអង្គារបានបង្កឲ្យមានទឹកជំនន់និងការបាក់ដី។ មនុស្សជិត ២,០០០ នាក់ត្រូវបានជម្លៀសទៅកាន់ទីទួលសុវត្ថិភាព។
ទីភ្នាក់ងារនេះបាននិយាយថាការខូចខាតនេះគឺធ្ងន់ធ្ងរបំផុតនៅក្នុងតំបន់ភាគខាងជើងប្រទេសហ្វីលីពីន។ ការខូចខាតផ្នែកកសិកម្មត្រូវបានប៉ាន់ប្រមាណថាមានចំនួន ៩,៧ លានដុល្លារអាមេរិក។
គួរបញ្ជាក់ថា Kompasu គឺជាព្យុះត្រូពិកទី ១៣ ដែលវាយប្រហារប្រទេសហ្វីលីពីន ក្នុងឆ្នាំនេះ។មានព្យុះទីហ្វុងប្រហែល ២០ បានចូលប្រទេសហ្វីលីពីនជារៀងរាល់ឆ្នាំ។ ក្នុងចំណោមកោះទាំងអស់របស់ហ្វីលីពីន គឺកោះ Luzon និងកោះ Visayas រងគ្រោះញឹកញាប់ជាងគេ៕
