សម្តេចអគ្គមហាពញាចក្រី ហេង សំរិនប្រធានរដ្ឋសភានៃព្រះរាជាណាចក្រកម្ពុជា បានចូលសម្តែងការគួរសមជាមួយ លោកង្វៀន សួនហ្វ៊ុក (Nguyen Xuan Phuc) ប្រធានរដ្ឋ នៃសាធារណរដ្ឋសង្គមនិយមវៀតណាម នៅវិមានប្រមុខរដ្ឋ នារដ្ឋធានីហាណូយ នាព្រឹកថ្ងៃទី១៣ ខែកញ្ញា ដែលជាថ្ងៃទី២ នៃដំណើរទស្សនកិច្ចផ្លូវការនិងមិត្តភាពរបស់គណៈប្រតិភូជាន់ខ្ពស់រដ្ឋសភាកម្ពុជា នៅសាធារណរដ្ឋសង្គមនិយមវៀតណាមពីថ្ងៃទី ១២ ដល់១៤ ខែកញ្ញាឆ្នាំ២០២២។
លោក ង្វៀន សួនហ្វ៊ុក បានអរគុណ និងស្វាគមន៍យ៉ាងកក់ក្តៅចំពោះវត្តមានសម្តេចប្រធានរដ្ឋសភានិងគណៈប្រតិភូកម្ពុជា ដែលបានមកបំពេញទស្សនកិច្ចផ្លូវការនិងមិត្តភាពនៅប្រទេសវៀតណាម ហើយបានចាត់ទុកថា ដំណើរទស្សនកិច្ចនាពេលនេះជាព្រឹត្តិការណ៍ដ៏មានសារៈសំខាន់ ជាឆ្នាំមិត្តភាព ដែលប្រទេសទាំងពីរប្រារព្ធខួបលើកទី ៥៥ ឆ្នាំ នៃទំនាក់ទំនងការទូតផ្លូវការរវាងប្រទេសទាំងពីរ។
លោកប្រធានរដ្ឋវៀតណាមបានលើកឡើងថា សម្តេចប្រធានរដ្ឋសភា ជាមហាមិត្ត និងជាវីរៈជនកំពូលមូយរូប ដែលបានចូលរួមចំណែកដ៍សំខាន់នៅក្នុងការពង្រឹង ពង្រីក ចំណងមិត្តភាពប្រទេសទាំងពីរឲ្យបានរឹងមាំឡើងជាលំដាប់។ នៅក្នុងឱកាសនោះ លោកប្រធានរដ្ឋបានចូលរួមអបអរសាទរចំពោះសមិទ្ធផលទាំងឡាយដែលរាជរដ្ឋាភិបាលកម្ពុជាសម្រេចបាននៅក្នុងការអភិវឌ្ឍប្រទេសជាតិ។
ជាមួយគ្នានេះ លោកក៏បានវាយតម្លៃខ្ពស់ចំពោះលទ្ធផលនៃជំនួបទ្វេភាគីរវាងសម្តេចប្រធានរដ្ឋសភានិងលោកប្រធានរដ្ឋសភាសង្គមនិយមវៀតណាម កាលពីរសៀលថ្ងៃទី១២ ខែកញ្ញា ម្សិលមិញ ដែលរួមចំណែកដល់ការពង្រឹង និងលើកកម្ពស់ចំណងមិត្តភាពនិងកិច្ចសហប្រតិបត្តិការរវាងទាំងពីរលើគ្រប់វិស័យឱ្យកាន់តែល្អប្រសើរថែមទៀត ជាពិសេសរវាងស្ថាប័នរដ្ឋសភា។
សម្តេចប្រធានរដ្ឋសភានៃព្រះរាជាណាចក្រកម្ពុជាក៏ បានសម្តែងក្តីរំភើបរីករាយ ដែលបានជួបលោកប្រធានរដ្ឋ ជាថ្មីម្តងទៀត និងបានវាយតម្លៃខ្ពស់ ចំពោះដំណើរទស្សនកិច្ចផ្លូវរដ្ឋ របស់លោកនៅកម្ពុជា កាលពីចុងឆ្នាំ២០២១ កន្លងទៅ ដែលទទួលបានលទ្ធផលជាផ្លែផ្កា គួរជាទីមោទន។
សម្តេចក៏បានថ្លែងនូវការអបអរសាទរ និងវាយតម្លៃខ្ពស់ចំពោះសមិទ្ធផលដ៏ធំធេងដែលបក្ស រដ្ឋ និង ប្រជាជនវៀតណាម សម្រេចបានក្នុងការកសាង និងអភិវឌ្ឍន៍សេដ្ឋកិច្ចសង្គម ឆ្ពោះទៅរកវឌ្ឍនភាពជឿនលឿន ស្របតាមទិសដៅនៃមហាសន្និបាតលើកទី១៣ របស់ បក្សកុម្មុយនីស្តវៀតណាម។
ឆ្លៀតឱកាសនោះ សម្តេចបានថ្លែងអំណរគុណចំពោះជំនួយជាថវិកា ដែលបក្ស រដ្ឋ និងប្រជាជនវៀតណាម បានផ្តល់ជូនប្រជាជនកម្ពុជា សម្រាប់កសាងអគារដ្ឋបាលរដ្ឋសភា ដែលបច្ចុប្បន្ន កំពុងមមាញឹកក្នុងការសាងសង់ និងប្រព្រឹត្តិទៅដោយរលូន ហើយគ្រោងនឹងបញ្ចប់នៅចុងឆ្នាំ២០២៣ ឬដើមឆ្នាំ២០២៤ ខាងមុខ។
សម្តេច ក៏បានគូសបញ្ជាក់ថា ប្រជាជនកម្ពុជាចងចាំជានិច្ច ចំពោះពលីកម្មដ៏ធំធេង របស់កងទ័ពស្ម័គ្រចិត្ត វៀតណាម ដែលបានបូជាសាច់ស្រស់ ឈាមស្រស់ដើម្បីជួយរំដោះប្រជាជនកម្ពុជា ពីរបបប្រល័យពូជសាសន៍ ខ្មែរក្រហម នាថ្ងៃ ៧ ខែមករា ឆ្នាំ១៩៧៩។
សូមជម្រាបថានៅមុនពេលចូលជួបសម្តែងការគួរជាមួយលោកប្រធានរដ្ឋវៀតណាម សម្តេចប្រធានរដ្ឋសភា និងគណៈប្រតិភូបានអញ្ជើញដាក់កម្រងផ្ការនិងគោរពវិញ្ញាណក្ខន្ធ លោកប្រធានហូជីមិញ ផងដែរ៕
