កីឡា ៖ Cristiano Ronaldo បានទទួលកាដូនាឡិកាដ៏ពិសេសមួយតម្លៃ ៧៨០ ០០០ដុល្លារ ដើម្បីអបអរសាទរ បន្ទាប់ពីសម្រេចផ្ទេរមកកាន់ក្រុម Al-Nassr នៅប្រទេសអារ៉ាប៊ីសាអូឌីត។
ខ្សែប្រយុទ្ធសញ្ជាតិព័រទុយហ្គាល់រូបនេះបានបញ្ចប់កិច្ចព្រមព្រៀងតម្លៃ ១៧៥លានផោនក្នុងមួយឆ្នាំដើម្បីផ្លាស់ទៅតំបន់មជ្ឈិមបូព៌ាក្នុងខែមករា ពីរខែបន្ទាប់ពីកិច្ចសន្យានៅ Manchester United របស់គេត្រូវបានបញ្ចប់ដោយចម្រូងចម្រាស។
Ronaldo គឺជាឯកអគ្គរាជទូតរបស់ក្រុមហ៊ុន Jacob & Co ហើយក្រុមហ៊ុននេះបានផលិតនាឡិកា “Caviar Flyin Tourbillon” សម្រាប់គាត់ ដើម្បីប្រើប្រាស់នៅក្នុងប្រទេសអារ៉ាប៊ីសាអូឌីត។
នាឡិកាដែលរចនាម៉ូដ ពណ៌បៃតងចាស់ ដើម្បីតំណាងឲ្យទង់ជាតិរបស់ប្រទេសអារ៉ាប៊ីសាអូឌីត គឺមានដាំត្បូងកម្របំផុតចំនួន៣៣៨គ្រាប់ និងមានមាសពណ៌ស ១៨ការ៉ាត់ ជាមួយខ្សែស្បែកក្រពើពណ៌បៃតង។
Ronaldo ពាក់នាឡិកាដ៏អស្ចារ្យនេះ តែក្នុងការហោះហើរទៅប្រទេសអារ៉ាប៊ីសាអូឌីតប៉ុណ្ណោះ។ ក្នុងអំឡុងពេលពិធីប្រកាសវត្តមានជាផ្លូវការនៅក្លិប Al Nassr ខ្សែប្រយុទ្ធសញ្ជាតិព័រទុយហ្គាល់វ័យ ៣៧ឆ្នាំរូបនេះ បានប្តូរមកពាក់នាឡិកាពណ៌លឿង ដែលជាពណ៌ប្រពៃណីរបស់ក្លិបវិញ៕