នៅព្រឹកថ្ងៃទី០៨ ខែមីនា ឆ្នាំ២០២៣ លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និងជាប្រធានសហព័ន្ធបាល់បោះរទេះជនពិការកម្ពុជា បានចុះសួរសុខទុក្ខ និងជួបសំណេះសំណាលជាមួយអត្តពលិកកីឡាបាល់បោះរទេះជនពិការកម្ពុជា និងអត្តពលិកប៉ារ៉ាហ្គេមទាំងអស់ ដែលកំពុងទទួលការហ្វឹកហាត់នៅមជ្ឈមណ្ឌលជាតិជនពិការតេជោសែន (បឹងបៃតង) ក្នុងឱកាសរីករាយទិវាសិទ្ធិនារីអន្តរជាតិ ៨ មីនា ២០២៣។
ក្នុងនាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានប៉ារ៉ាឡាំពិកកម្ពុជា លោក ទេសរដ្ឋមន្ត្រី បានជម្រុញឲ្យអត្តពលិកជនពិការទាំងអស់ ត្រូវបង្កើនការហ្វឹកហាត់ឲ្យកាន់តែខ្លាំងក្លាបន្ថែមទៀត ទាំងកម្លាំងកាយ កម្លាំងចិត្ត និងបច្ចេកទេស ជាពិសេសត្រូវបង្កើនស្មារតីជាក្រុម និងសាមគ្គីភាព ដើម្បីត្រៀមចូលរួមប្រកួតអាស៊ានប៉ារ៉ាហ្គេមលើកទី១២ ដែលកម្ពុជានឹងធ្វើជាម្ចាស់ផ្ទះក្នុងឆ្នាំ២០២៣នេះ។
លោក ទេសរដ្ឋមន្ត្រី បានកោតសរសើរដល់ក្រុមនារីបាល់បោះរទេះជនពិការកម្ពុជា ដែលបានដណ្តើមមេដាយមាសជូនជាតិមាតុភូមិ ព្រមទាំងជូនពរឲ្យក្រុមអត្តពលិកបាល់បោះរទេះជនពិការ ទទួលបានជោគជ័យជាបន្តបន្ទាប់ទៀត ក្នុងការប្រកួតអាស៊ានប៉ារ៉ាហ្គេមខាងមុខនេះ។
ក្នុងឱកាសចុះសួរសុខទុក្ខ លោក ទេសរដ្ឋមន្ទ្រី បាននាំយកនូវទឹកសុទ្ធ ៤០០ យូរ និង ១០០ កេសធំ, នំភីហ្សា និងថវិកាមួយចំនួន ប្រគល់ជូនដល់ក្រុមអត្តពលិកប៉ារ៉ាហ្គេម ផងដែរ៕
