បន្ទាយមានជ័យ៖ នៅក្នុងបរិវេនពន្ធនាគារ ស្ថិតក្នុងភូមិទំនប់ជ្រៃ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ នៅថ្ងៃនេះ មន្ត្រីពន្ធនាគារ ចំនួន ១១១នាក់ក្នុងនោះមានស្រីចំនួន ១៩នាក់ បានស្ម័គ្រចិត្តចូលរួមបរិច្ចាគឈាមដើម្បីជួយសង្គ្រោះជីវិតមនុស្សទូទៅនៅតាមមន្ទីរពេទ្យ។
ក្នុងពិធីនេះ មានការចូលរួមពី អនុរក្សថ្នាក់លេខ ១ លោកសែម ស៊ីណង អគ្គនាយករង នៃអគ្គនាយកដ្ឋានពន្ធគារ , លោកអ៊ុង ស៊ីផាន ប្រធានពន្ធនាគារខេត្តបន្ទយមានជ័យ , លោក ឡេ ច័ន្ទ សង្វាត ប្រធានមន្ទីរសុខាភិបាលខេត្តបន្ទាយមានជ័យ និងមន្ត្រីពេទ្យជាច្រើននាក់។
លោក អ៊ុង ស៊ីផាន ប្រធានពន្ធនាគារខេត្ត បានអានរបាយការណ៍ សង្ខេប ស្តីពីស្ថានភាពជនជាប់ឃុំក្នុងពន្ធគារខេត្តបន្ទាយមានជ័យ កំពុងឃុំជាក់ស្តែងមានចំនួនសរុប១.៨៩៣នាក់ ស្រីមានចំនួន១០០នាក់។
លោក អ៊ុង ស៊ីផាន ក៏បានបញ្ជាក់ឲ្យដឹងថា ពន្ធនាគារខេត្តបន្ទាយមានជ័យបានអនុវត្តនៅតួនាទីភារកិច្ចរបស់ខ្លួនដូចជាការអប់រំកែប្រែស្ដានិតិសម្បទា ការបណ្ដុះបណ្ដាលវិជ្ជាជីវៈ ការរក្សាសន្តិសុខសណ្ដាប់ធ្នាប់នៅក្នុងពន្ធនាគារ ការងារកសិកម្មសិប្បកម្ម ការអភិវឌ្ឍន៍ធនធានមនុស្ស និងការអភិវឌ្ឍន៍ហេដ្ឋារចនាសម្ព័ន្ធនានា ប្រកបដោយភាពទទួលខុសត្រូវខ្ពស់ ។ក្រៅពីនេះអង្គភាពមានប៉ុស្តិ៍សុខភាពមួយខ្នងដែលគ្រប់គ្រងដោយអង្គភាពផ្ទាល់នឹងមានផ្នែកសុខាភិបាលជាអ្នកទទួលខុសត្រូវផងដែរ។
លោកបានបញ្ជាក់បន្ថែមថា អង្គភាពបានយកចិត្តទុកដាក់លើគោលនយោបាយកំណែទម្រង់ពន្ធនាគារគឺការអប់រំកែប្រែនិងស្ដានីតិសម្បទាដល់ជនជាប់ឃុំដែលមានអប់រំផ្លូវចិត្តរៀនអក្សរខ្មែរគ្រប់ចំណេះដឹង។ ចំណុច នេះអង្គភាពបានយកចិត្តទុកដាក់ធ្វើការបែងចែកចំណាច់ថ្នាក់ សន្តិសុខដែលជាមូលដ្ឋានសម្រាប់ស្មើសុំបន្ធូរបន្ថយនិងលើកលេងទោសដល់ទណ្ឌិតស្របតាមនីតិវិធីច្បាប់។
លោកអ៊ុង ស៊ីផាន បានបន្តថា ជនជាប់ឃុំទាំងអស់ត្រូវបានប្រធានពន្ធនាគារយកចិត្តទុកដាក់បណ្តុះបណ្តាលវិជ្ជាជីវះជូនដល់គាត់មានដូចជា រៀនកាត់ដេរ រៀនជួសជុលគ្រឿងអេឡិតត្រួនិច រៀនជួសជុលម៉ូតូ រៀនភ្លេងសម័យ រៀនកាត់សក់ រៀនអក្សរខ្មែរជាដើម ក្នុងនោះជនជាប់ឃុំត្រូវបានបន្ធូបន្ថយទោសលើកលែងទោសក្នុង១ឆ្នាំមានចំនួន៣លើក។
លោក ឡេច័ន្ទ សង្វាត មានប្រសាសន៍ឲ្យដឹងដែរថា ការបរច្ចាកឈាមនេះជាអំពើដ៏ល្អ ប្រពៃរបស់មនុស្សនៅក្នុងសង្គម ដែលយើងអាចធ្វើចានទាំងអស់គ្នា អំណោយឈាមជាអំណោយនៃជីវិត ដែលមនុស្សមានសុខភាពល្អ អាចចែករំលែកទៅឲ្យមនុស្សទាំងឡាយនៅក្នុងសហគមន៍ ជាមួយគ្នានៅពេលដែលមានអ្នកជម្ងឺមានគ្រោះថ្នាក់ ហើយត្រូវការសង្គ្រោះដោយការចាក់បញ្ចូលឈាម។
លោក អនុរក្សថ្នាក់លេខ ១ សែម ស៊ីណង បានឲ្យដឹងដែរថា នេះជាលើកទី១ហើយដែលក្នុងពន្ធនាគារខេត្តបន្ទាយមានជ័យ មានការបរិច្ចាកឈាម ព្រោះវាមានសារៈសំខាន់ណាស់ក្នុង១ថ្ងៃសម្រាប់យកទៅសង្គ្រោះជីវិតមនុស្សនៅក្នុងខេត្តបន្ទាយមានជ័យដែលក្នុង១ឆ្នាំៗសម្រូវការឈាមចំនួន១.៦០០កំប្លោកពីអ្នកផ្តល់ឈាម៕
