ប្រធានសិទ្ធិមនុស្សរបស់អង្គការសហប្រជាជាតិ បានឲ្យដឹង កាលពីថ្ងៃសុក្រថា មនុស្សជាង ១,១០០ នាក់ ត្រូវបានសម្លាប់ រងរបួស និងចាប់ពង្រត់នៅប្រទេសហៃទី គិតត្រឹមខែ មករា ឆ្នាំនេះ ជាខែដែលមានអំពើហិង្សាបំផុតនៅក្នុងប្រទេស និងស្ថិតក្នុងជម្លោះរយៈពេល ២ ឆ្នាំ ចុងក្រោយ។
បច្ចុប្បន្ននេះក្រុមក្មេងទំនើង បានបន្តសកម្មភាពនៅក្នុងផ្នែកមួយចំនួនធំនៃប្រទេស ហើយអំពើឃាតកម្មនៅក្នុងប្រទេសកើនឡើងទ្វេដង កាលពីឆ្នាំមុន រហូតដល់ជិត ៤,៨០០ ករណី។ នេះបើយោងតាមរបាយការណ៍របស់អង្គការសហប្រជាជាតិដែលចេញផ្សាយ កាលពីថ្ងៃអង្គារ។
ប្រធានសិទ្ធិមនុស្សអង្គការសហប្រជាជាតិ លោក Volker Turk បាននិយាយ នៅក្នុងសេចក្តីថ្លែងការណ៍មួយថា ស្ថានភាពសិទ្ធិមនុស្សដ៏ធ្ងន់ធ្ងររួចទៅហើយកាន់តែយ៉ាប់យ៉ឺនបន្ថែមទៀត ចំពេលមានអំពើហិង្សាក្រុមក្មេងទំនើង ដែលកំពុងកើនឡើង ជាមួយនឹងផលវិបាកដ៏មហន្តរាយសម្រាប់ជនជាតិហៃទី៕