កីឡា ៖ លោក Oleg Starynskyi គ្រូបង្វឹកក្រុមបាល់ទាត់ភ្នំពេញក្រោនបាននិយាយពីការប្រកួតជាមួយក្រុម Central Coast Mariners នៅថ្ងៃស្អែកថា «យើងបានចំណាយពេលវេលា និងកម្លាំងច្រើនដែរសម្រាប់ការមកដល់ទីនេះ ប៉ុន្តែយើងក៏មានភាពរំភើបដូចគ្នា។ ការប៉ះគ្នាជាមួយ Central Coast Mariners គឺនឹងមានភាពតានតឹងជាមួយនឹងការប្រកួតប្រជែងខ្ពស់។ នេះជាការប្រកួតដែលលេងតែមួយប្រកួត ក្នុងការជ្រើសរើសអ្នកឈ្នះឡើងទៅវគ្គបន្ត។
លោក Oleg បានបន្តថា សម្រាប់ការប្រកួតនៅស្អែក វានឹងទៅជាការប្រកួតដ៏អស្ចារ្យ ព្រោះក្រុមអូស្ត្រាលីនេះគឺជាក្រុមមួយដែលលេចធ្លោរបើយើងប្រៀបធៀបជាមួយក្រុមផ្សេងៗទៀត។ ក្នុងបាល់ទាត់អ្វីៗក៏អាចកើតមានឡើងដែរ យើងសង្ឃឹមថាយើងនឹងអាចធ្វើវាបាន ព្រោះគ្រប់គ្នាដែលមកទីនេះបានត្រៀមខ្លួនរួចជាស្រេចដើម្បីការប្រកួត។»
ភ្នំពេញក្រោនរបស់កម្ពុជានឹងប្រកួតវគ្គពាក់កណ្តាលផ្តាច់ព្រ័ត្រតំបន់អាស៊ាន ជាមួយក្រុមខ្លាំង Central Coast Mariners របស់ អូស្ត្រារលី នៅថ្ងៃទី១៣ ខែកុម្ភៈ ឆ្នាំ២០២៤ ស្អែកនេះវេលាម៉ោង៤៖០០នាទីរសៀល នាកីឡដ្ឋាន INDUSTREE GROUP STADIUM (GOSFORD) ប្រទេសអូស្ដ្រាលីផ្ទាល់តែម្ដង។ ដោយការប្រកួតនេះធ្វើឡើងតែមួយជើងប៉ុណ្ណោះ។
គួរបញ្ជាក់ឱ្យដឹងផងដែរថាសម្រាប់អ្នកឈ្នះវគ្គពាក់កណ្តាលផ្តាច់ព្រ័ត្រនឹងត្រូវប៉ះគ្នាក្នុងវគ្គផ្តាច់ព្រ័ត្រ ASEAN Zonal ជើងតែមួយ នៅថ្ងៃទី 22 ខែកុម្ភៈ ឆ្នាំ 2024៕
