កីឡា៖ ក្លឹប Premier League បានអនុម័តជាឯកច្ឆ័ន្ទលើការប្រើប្រាស់បច្ចេកវិទ្យាថ្មី ក្នុងការចាប់បាល់ Offside ចាប់ពីរដូវកាល ២០២៤-២៥ តទៅ។
បច្ចេកវិទ្យាចាប់បាល់ Offside ដែលលីគកំពូលអង់គ្លេស នឹងប្រើប្រាស់នោះគឺមានឈ្មោះថា Semi-Automated Offside Technology (ហៅកាត់ថា SAOT)។ បច្ចេកវិទ្យានេះមានសមត្ថភាពតាមដានដំណើរ និងចលនារបស់កីឡាករនីមួយៗលើទីលានបានច្បាស់ ហើយអាចចាប់ Offside មានលក្ខណៈប្រាកដ និងរហ័សជាងមុន។
បើតាមការលើកឡើងរបស់សារព័ត៌មាន BBC ថាការប្រើប្រាស់ SAOT នឹងជួយកាត់បន្ថយពេលចាប់បាល់ Offside មកត្រឹមប្រមាណ ៣០ វិនាទី។ បច្ចុប្បន្នការប្រើប្រាស់ VAR ក្នុងការចាប់ Offiside ចំណាយពេលយ៉ាងតិចជាងមួយនាទី។ នេះមិនទាន់រាប់នូវការតវ៉ាផ្សេងៗ ដែលបង្កការរាំងស្ទះដល់ពេលវេលា និងដំណើរការប្រកួត៕
