មេបញ្ជាការជាន់ខ្ពស់នៃកងឆ្មាំបដិវត្តន៍អ៊ីស្លាមអ៊ីរ៉ង់ បានព្រមានថា ទីតាំងនុយក្លេអ៊ែររបស់អ៊ីស្រាអែល នឹងត្រូវកំណត់គោលដៅ កម្ទេចប្រសិនបើអ៊ីស្រាអែលចាត់វិធានការប្រឆាំងនឹងទីតាំងនុយក្លេអ៊ែរអ៊ីរ៉ង់។
ទីភ្នាក់ងារសារព័ត៌មាន Tasnim ដែលមានទំនាក់ទំនងជាមួយឆ្មាំបដិវត្តន៍បានដកស្រង់ការធ្វើអត្ថាធិប្បាយបែបនេះ ដោយឧត្តមសេនីយ៍ត្រី Ahmad Haqtalab កាលពីថ្ងៃទី១៨ ខែមេសា ឆ្នាំ២០២៤។
លោកបាននិយាយបែបនេះ គឺចំពេលមានការព្រួយបារម្ភថា អ៊ីស្រាអែលអាចវាយប្រហារទីតាំងនុយក្លេអ៊ែររបស់អ៊ីរ៉ង់ ជាការសងសឹកចំពោះការវាយប្រហារដោយមីស៊ីល និងយន្តហោះគ្មានមនុស្សបើកដែលធ្វើឡើងដោយទីក្រុងតេអេរ៉ង់ប្រឆាំងនឹងអ៊ីស្រាអែលកាលពីចុងសប្តាហ៍កន្លងទៅ។
លោកឧត្តមសេនីយ៍ Haqtalab ដែលទទួលបន្ទុកធានាសន្តិសុខនៃទីតាំងនុយក្លេអ៊ែរអ៊ីរ៉ង់បាននិយាយថា ទីតាំងនុយក្លេអ៊ែររបស់អ៊ីស្រាអែលត្រូវបានកំណត់អត្តសញ្ញាណរួចហើយ ហើយជាមូលដ្ឋានដែលត្រូវកម្ទេច នៅពេលដែលអ៊ីស្រាអែលវាយបំផ្លាញទីតាំងនុយក្លេអែររបស់យើង។
លោកបាននិយាយបន្តថា ប្រសិនបើអ៊ីស្រាអែលព្យាយាមប្រើការគំរាមកំហែងវាយប្រហារទីតាំងនុយក្លេអ៊ែរអ៊ីរ៉ង់ ដើម្បីដាក់សម្ពាធលើទីក្រុងតេអេរ៉ង់នោះ គោលនយោបាយនុយក្លេអ៊ែររបស់ប្រទេសលោកទំនងជានឹងត្រូវបានកែសម្រួលភ្លាមៗតែម្តង។
បច្ចុប្បន្ន អ៊ីរ៉ង់នៅតែប្រកាន់ជំហរថា កម្មវិធីនុយក្លេអ៊ែររបស់ខ្លួនគឺក្នុងគោលបំណងសន្តិភាព ហើយក្រុងតេអេរ៉ង់គ្មានចេតនាកាន់កាប់អាវុធនុយក្លេអ៊ែរឡើយ។
ចំណែករដ្ឋាភិបាលអ៊ីស្រាអែលបាននិងកំពុងពិភាក្សា អំពីការឆ្លើយតបរបស់ខ្លួនចំពោះការវាយប្រហាររបស់អ៊ីរ៉ង់។ នាយករដ្ឋមន្ត្រីលោក Benjamin Netanyahu បាននិយាយនៅក្នុងកិច្ចប្រជុំគណៈរដ្ឋមន្ត្រីកាលពីថ្ងៃពុធថា រដ្ឋអ៊ីស្រាអែលនឹងធ្វើអ្វីដែលចាំបាច់ដើម្បីការពារខ្លួន ។
ប្រធានទីភ្នាក់ងារថាមពលអាតូមិកអន្តរជាតិ លោក Rafael Grossi បាននិយាយកាលពីថ្ងៃចន្ទថា ទីភ្នាក់ងាររបស់លោកមានការព្រួយបារម្ភអំពីលទ្ធភាពដែលអ៊ីស្រាអែលអាចកំណត់គោលដៅទីតាំងនុយក្លេអ៊ែរអ៊ីរ៉ង់។ ប៉ុន្តែលោកអំពាវនាវឲ្យអ៊ីស្រាអែលអនុវត្តត្រូវតែមានការអត់ធ្មត់កម្រិតខ្ពស់៕
