អ្នកសង្កេតការណ៍អន្តរជាតិ អះអាងថា ប្រទេសចិន បានក្លាយជាភាគីពាក់ព័ន្ធដ៏មានឥទ្ធិពលបំផុតមួយនៅក្នុងវិបត្តិនយោបាយនៅប្រទេសមីយ៉ាន់ម៉ា ដោយធ្លាប់ចុះកិច្ចព្រមព្រៀងបទឈប់បាញ់ក្នុងចំណោមភាគីពាក់ព័ន្ធដទៃទៀត កាលពីខែមករា។
ទោះជាយ៉ាងណាក៏ដោយ អំឡុងពេលការប្រយុទ្ធគ្នានៅតែបន្ត អ្នកសង្កេតការណ៍ បាននិយាយថា ទីក្រុងប៉េកាំង មានដែនកំណត់របស់ខ្លួន ហើយសមាគមប្រជាជាតិអាស៊ីអាគ្នេយ៍ (អាស៊ាន) ត្រូវការដើរតួនាទីធំជាងនេះនៅក្នុងកិច្ចខិតខំប្រឹងប្រែងសម្របសម្រួល។
លោកបណ្ឌិត Brian Wong ដែលជាអ្នកសិក្សានៅមជ្ឈមណ្ឌលនៃសាកលវិទ្យាល័យហុងកុងស្តីពីចិន និងពិភពលោកសហសម័យ បានលើកឡើងថា វិធីសាស្ត្រសម្របសម្រួលរវាងប្រទេសចិន និងប្លុកក្នុងតំបន់ ជាពិសេសប្រទេសថៃ ដែលមីយ៉ាន់ម៉ាមានព្រំដែន និងរីករាយនឹងទំនាក់ទំនងជិតស្និទ្ធជាមួយ អាចបង្កើតផលផ្លែផ្កាកាន់តែច្រើននៅក្នុងសម្រួលដំណើរការសន្តិភាព។
លោក បានបន្ថែមថា ប្រសិនបើចិន ចង់នាំមកនូវសន្តិភាពដល់តំបន់ ចាំបាច់ត្រូវមានភាគីពាក់ព័ន្ធផ្សេងទៀត រួមទាំងអាស៊ាន ផ្ទុយពីការចូលមកក្នុងឋានៈជាមហាអំណាចឯកតោភាគីដែលកំពុងឈានចូល និងព្យាយាមមានឥទ្ធិពល និងបង្កើតនយោបាយក្នុងស្រុកក្នុងប្រទេសមីយ៉ាន់ម៉ា។
គួរបញ្ជាក់ថា មានការប្រយុទ្ធគ្នាយ៉ាងខ្លាំងមួយរយៈចុងក្រោយនេះរវាងក្រុមឧទ្ទាមដែលតំណាងឲ្យប្រជាជនមីយ៉ាន់ម៉ា ជាមួយនឹងរបបយោធា នៅតាមព្រំដែនជាមួយថៃ ដែលធ្វើឲ្យប្រជាជនជាច្រើនម៉ឺននាក់ រត់ភៀសខ្លួនចេញពីប្រទេស៕
