សូមជម្រាបថា កាលពីរសៀលថ្ងៃទី១៨ ខែមេសា ឆ្នាំ២០២៤ មានករណីឃាតកម្មដ៏សាហាវមួយបានកើតទ្បើង នៅចំណុចផ្ទះលេខ៣១ ផ្លូវ៣៦ បុរីពិភពថ្មីឈូកវ៉ា២ ភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះមានឈ្មោះ មាស លក្ខិណា អាយុ២៤ឆ្នាំ មានប្តីជាជនជាតិចិន ឈ្មោះ ហួ ស៊ិន អាយុ៣៧ឆ្នាំ បម្រើការនៅក្រុមហ៊ុនកិនថ្ម មានទីតាំងក្នុងខេត្តកំពង់ស្ពឺ។ បច្ចុប្បន្ន ស្ត្រីរងគ្រោះ និងប្ដីជនជាតិចិន រស់នៅដោយក្ដីសុខសាន្តក្នុងផ្ទះកើតហេតុខាងលើ ហើយមានកូនប្រុសចំនួន២នាក់ក្នុងបន្ទុក។
ដោយឡែក ជនដៃដល់ជាឃាតករមានឈ្មោះ លឹម គីណែត អាយុ២៥ឆ្នាំ មានទីលំនៅភូមិព្រែកជីក ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។
តាមព័ត៌មានដែលទទួលបាន នៅក្នុងមន្ទីរពេទ្យរុស្សី នាព្រឹក ថ្ងៃទី១៩ ខែមេសា ឆ្នាំ២០២៤ នេះ ជនដៃដល់បានសារភាពប្រាប់សមត្ថកិច្ចថា ខ្លួនជាពលករនៅប្រទេសថៃ ហើយមានទំនាក់ទំនងស្នេហាជាមួយនារីរងគ្រោះអស់រយៈពេលជាង២ឆ្នាំមកហើយ ប៉ុន្តែមិនដែលបានជួបគ្នាផ្ទាល់ទេ គឺទំនាក់ទំនងតាមរយៈឆាតហ្វេសប៊ុកតែប៉ុណ្ណោះ៕