រដ្ឋមន្ត្រីការពារជាតិអ៊ីរ៉ង់ លោក Mohammad Reza Ashtiani បាននិយាយ នៅក្នុងកិច្ចប្រជុំជាមួយសមភាគីរុស្ស៊ីលោក Sergey Shoigu នៅទីក្រុង Astana ថា ការវាយប្រហារភេរវកម្មទាំងនៅក្នុងប្រទេសរុស្ស៊ី និងអ៊ីរ៉ង់ កើតចេញពីការគាំទ្រក្រុមភេរវកររបស់សហរដ្ឋអាមេរិក និងបណ្តាប្រទេសលោកខាងលិចផ្សេងទៀត។
លោក Ashtiani បានលើកឡើងថា ការវាយប្រហារភេរវកម្មក្នុងប្រទេសរុស្ស៊ី និងអ៊ីរ៉ង់ គឺជាលទ្ធផលនៃការគាំទ្រដល់ក្រុមភេរវករដោយបណ្តាប្រទេសលោកខាងលិច ជាពិសេសអាមេរិក ។
រដ្ឋមន្ត្រីការពារជាតិរូបនេះ ក៏បានសង្កត់ធ្ងន់ថា រដ្ឋសមាជិកនៃអង្គការសហប្រតិបត្តិការសៀងហៃ (SCO) គួរតែប្រើប្រាស់សក្តានុពល SCO ដើម្បីកាត់បន្ថយការគំរាមកំហែងរួម។
គួរបញ្ជាក់ថា កន្លងមក មានការវាយប្រហារភេរវកម្មធំៗជាច្រើន ដែលកើតឡើងនៅក្នុងប្រទេសរុស្ស៊ី និងអ៊ីរ៉ង់ ដោយបណ្ដាលឲ្យមានមនុស្សស្លាប់ និងរបួសរាប់ពាន់នាក់៕