កីឡា ៖ លោក Mauricio Pochettino ត្រូវបានគេរាយការណ៍ថា បានចាប់អារម្មណ៍ក្នុងការស្នងតំណែងគ្រូបង្វឹកអង់គ្លេសលោក Gareth Southgate បន្ទាប់ពីការចាកចេញរបស់លោកពី Chelsea កាលពីពេលថ្មីៗនេះ។
គ្រូបង្វឹកសញ្ជាតិអាហ្សង់ទីនរូបនេះបានស្នាក់នៅកីឡដ្ឋាន Stamford Bridge បានត្រឹមតែមួយរដូវកាលប៉ុណ្ណោះ បន្ទាប់ពីក្លិបបានបញ្ជាក់កាលពីថ្ងៃអង្គារថាលោកបានចាកចេញពី Chelsea ដោយមានការយល់ព្រមពីគ្នាទៅវិញទៅមក។
លោក Pochettino បានដឹកនាំ Chelsea ទៅកាន់វគ្គផ្តាច់ព្រ័ត្រ EFL Cup និង FA Cup វគ្គពាក់កណ្តាលផ្តាច់ព្រ័ត្រ ខណៈពេលដែលក្រុមរបស់លោកក៏បានធានាបាននូវវគ្គជម្រុះទ្វីបអឺរ៉ុបជាមួយនឹងការបញ្ចប់យ៉ាងល្អមួយក្នុងក្របខណ្ឌ Premier League រដូវកាលនេះ ។
ក្រុមតោខៀវបានឈ្នះការប្រកួត Premier League ចុងក្រោយចំនួន ៥ របស់ពួកគេដើម្បីដណ្តើមបានចំណាត់ថ្នាក់លេខ ៦ ដែលតំណាងឱ្យភាពប្រសើរឡើងពីការបញ្ចប់ក្នុងចំណាត់ថ្នាក់ទី ១២ របស់ពួកគេនៅរដូវកាល 2022-23 ។
ទោះក្រុមរបស់លោកព្យាយាមលេងឲ្យមានភាពស៊ីសង្វាក់គ្នាក្នុងអំឡុងពេលរដូវកាលនេះ ក៏ដោយ ប៉ុន្តែក្លិបហាក់ដូចចង់បានគ្រូបង្វឹកថ្មីដើម្បីកសាងក្រុមឡើងវិញនៅរដូវកាលក្រោយ។ ទោះជាយ៉ាងណាក៏ដោយ ការសម្រេចចិត្តចុងក្រោយនេះត្រូវបានធ្វើឡើងដោយភាគីទាំងពីរយល់ព្រមចែកផ្លូវគ្នារៀងខ្លួនៗ បន្ទាប់ពីបញ្ចប់នៃរដូវកាល។
ខណៈពេលដែល Chelsea កំពុងស្វែងរកអ្នកចាត់ការថ្មី លោក Pochettino បានត្រលប់មកទីផ្សារការងារវិញ ហើយកំពុងស្វែងរកឱកាសបន្ទាប់របស់លោក។
យោងតាមកាសែត The Sun បានឲ្យដឹងថា គ្រូបង្វឹកវ័យ ៥២ ឆ្នាំរូបនេះចង់ក្លាយជាអ្នកចាត់ការទូទៅរបស់ក្រុមជម្រើសជាតិអង់គ្លេស ប្រសិនបើលោក Southgate ចាកចេញពីតំណែងរបស់លោកបន្ទាប់ពី Euro 2024 ៕
