អភិបាលក្នុងតំបន់ បានឲ្យដឹងថា មនុស្សយ៉ាងហោចណាស់ ៩ នាក់ស្លាប់ រួមទាំងកុមារម្នាក់ និង ៥០ នាក់ទៀតរងរបួស បន្ទាប់ពីឆាកសម្រាប់ឃោសនាបោះឆ្នោតបាក់រលំ អំឡុងការប្រមូលផ្តុំយុទ្ធនាការនៅរដ្ឋ Nuevo León ភាគខាងជើងប្រទេសម៉ិកស៊ិក។
ឧប្បត្តិហេតុនេះ បានកើតឡើងនៅពេលដែលបេក្ខជនប្រធានាធិបតីកណ្តាលឆ្វេង លោក Jorge Alvarez Maynez កំពុងថ្លែងសុន្ទរកថា នៅក្នុងទីក្រុង San Pedro Garza Garcia ជិតទីក្រុង Monterrey ។
លោក Maynez មិនមានរងរបួសក្នុងឧបទ្ទវហេតុនោះទេ ប៉ុន្តែសមាជិកក្រុមលោក ជាច្រើននាក់បានរងរបួស។
វីដេអូជាក់ស្តែង ដែលបង្ហាញពីការដួលរលំភ្លើងបំភ្លឺ ខណដែលមានមនុស្សមួយចំនួននៅលើឆាក។
អភិបាលរដ្ឋ លោក Samuel Garcia បានបញ្ជាក់ថា ឧបទ្ទវហេតុនេះ កើតឡើងដោយសារតែផ្គររន្ទះ និងខ្យល់បក់ខ្លាំងនៅក្នុងតំបន់នេះ ខណលោកក៏ជំរុញឲ្យប្រជាជនស្នាក់នៅក្នុងផ្ទះ ជៀសវាងប្រឈមបញ្ហាអាកាសធាតុ៕
