ទូរទស្សន៍ NDR របស់អាល្លឺម៉ង់ បានរាយការណ៍ថា យោធាសហរដ្ឋអាមេរិក បញ្ជូនគ្រាប់បែកចង្កោមជាច្រើនប្រភេទទៅឱ្យប្រទេសអាល្លឺម៉ង់ ហើយរក្សាទុកវា មុនពេលប្រគល់ឱ្យអ៊ុយក្រែន ។
នេះមានន័យថាទីក្រុងប៊ែរឡាំង អាចបំពានលើអនុសញ្ញាអង្គការសហប្រជាជាតិដែលហាមប្រាមអាវុធ ទោះបីជាខ្លួនបដិសេធចំពោះរបាយការណ៍នេះក៏ដោយ ។
គ្រាប់បែកចង្កោមត្រូវបានហាមឃាត់ដោយប្រទេសជាង ១១០ ក្រោមអនុសញ្ញាអង្គការសហប្រជាជាតិឆ្នាំ ២០០៨ ស្តីពីគ្រាប់បែកចង្កោម ដោយសារគ្រោះថ្នាក់ខ្លាំងដែលបង្កដល់ជនស៊ីវិល។
គ្រាប់បែកប្រភេទនេះ មានសមត្ថភាពខ្ពស់ដោយខ្ចាត់ខ្ចាយគ្រាប់ជាផ្នែកតូចៗ ដែលខ្លះមិនទាន់ផ្ទុះ និងអាចបង្កទៅជាគ្រាប់មីនយ៉ាងមានប្រសិទ្ធភាព។
NDR បានបន្ថែមថា គ្រាប់បែកចម្រូងចម្រាសនេះ បច្ចុប្បន្ននេះ កំពុងរក្សាទុកនៅឃ្លាំងដែលគ្រប់គ្រងដោយសហរដ្ឋអាមេរិកនៅទីក្រុង Miesau ភាគខាងលិចប្រទេសអាល្លឺម៉ង់ នេះបើយោងតាមអ្នកនាំពាក្យរបស់បញ្ជាការកងទ័ពអាមេរិកអឺរ៉ុប និងអាហ្រ្វិក។
គួរបញ្ជាក់ថា ការបញ្ជូនគ្រាប់បែកប្រភេទនេះ ទៅរក្សាទុកនៅអាល្លឺម៉ង់ គឺជាផ្នែកមួយនៃជំនួយរបស់អាមេរិក សម្រាប់អ៊ុយក្រែន ៕