កីឡា ៖ អ្នកចាត់ការថ្មី Manchester United លោក Erik ten Hag បានលើកឡើងកាលពីថ្ងៃចន្ទថា ខ្សែប្រយុទ្ធកំពូល Cristiano Ronaldo របស់ក្លិប មិនមែនសម្រាប់លក់នោះទេ ហើយពិតណាស់បានស្ថិតក្នុងគម្រោងរបស់ក្លិបក្នុងរដូវកាលនេះ។
អនាគតរបស់កីឡាករវ័យ ៣៧ឆ្នាំខាងលើនេះ នៅកីឡដ្ឋាន Old Trafford គឺជាប្រធានបទដែលមានការចាប់អារម្មណ៍ បន្ទាប់ពីលោកត្រូវបានគេរាយការណ៍ថា បានប្រាប់ក្លិបថាលោកចង់ចាកចេញ។ Ronaldo មិនបានចូលរួមជាមួយក្រុម សម្រាប់ការប្រកួតមុនរដូវកាល ដែលចាប់ផ្តើមនៅថៃនោះទេ ដោយអះអាងថា មានបញ្ហាគ្រួសារ ហើយសន្និសីទសារព័ត៌មានរបស់លោក Ten Hag មុនការប្រកួតមិត្តភាពនាថ្ងៃអង្គារជាមួយនឹងក្រុម Liverpool លោកបានឆ្លើយអំពីសំណួរស្តីពីអនាគតរបស់កីឡាកររូបនេះ។
យ៉ាងណាក្ដីលោក Ten Hag បាននិយាយថា «យើងមានគម្រោងជាមួយ Ronaldo សម្រាប់រដូវកាលនេះ។ ដូច្នេះហើយ ខ្ញុំកំពុងសំឡឹងទៅមុខ ក្នុងការធ្វើការងារជាមួយគាត់»។ « Ronaldo មិនមែនសម្រាប់លក់នោះទេ ហើយគេស្ថិតក្នុងគម្រោងរបស់យើង ហើយយើងចង់ទទួលបានជោគជ័យជាមួយគ្នា»។
Ronaldo នៅសល់រយៈពេល ១ឆ្នាំទៀត លើកិច្ចសន្យារបស់លោក ក្នុងការលេងឲ្យ Manchester United៕