វ៉ាស៊ីនតោន៖ អ្នកនាំពាក្យក្រសួងការពារជាតិ លោក Patrick Ryder បាននិយាយ នៅក្នុងសន្និសីទសារព័ត៌មានមួយថា ការវាយប្រហារនាពេលថ្មីៗនេះរបស់កងកម្លាំងប្រដាប់អាវុធអាមេរិក នៅក្នុងប្រទេសអ៊ីរ៉ាក់ និងស៊ីរី ក្នុងការឆ្លើយតបទៅនឹងការបាញ់ផ្លោងលើមូលដ្ឋានទ័ពនៅហ្ស៊កដានី នឹងមិនមែនជាយុទ្ធនាការរយៈពេលវែងនោះទេ។
អ្នកនាំពាក្យរូបនេះ បានលើកឡើងថា តាមខ្ញុំយល់ វាមិនមែនជារឿងសង្គ្រាមអ្វីនោះទេ ដោយឆ្លើយសំណួរថាតើយុទ្ធនាការនេះអូសបន្លាយយូរប៉ុណ្ណា។ លោក បានបន្ថែមថា ប៉ុន្តែជាថ្មីម្តងទៀត ខ្ញុំមិនបញ្ជាក់ឲ្យជាក់លាក់អំពីអ្វីដែលប្រតិបត្តិការនាពេលអនាគតអាចមានរូបរាងឡើងនោះទេ។
អ្នកនាំពាក្យក្រសួងការពារជាតិអាមេរិក លោក Patrick Ryder បាននិយាយ នៅក្នុងសន្និសីទសារព័ត៌មានមួយថា យន្តហោះគ្មានមនុស្សបើក kamikaze បានធ្លាក់ដល់ដីមិនឆ្ងាយប៉ុន្មានពីមូលដ្ឋានកងកម្លាំងប្រដាប់អាវុធអាមេរិក នៅភាគខាងកើតប្រទេសស៊ីរី។
គួរបញ្ជាក់ថា នាពេលថ្មីៗនេះ អាមេរិក បង្កើនការវាយប្រហារនៅក្នុងប្រទេសអ៊ីរ៉ាក់ និងស៊ីរី ដោយសំដៅលើគោលដៅក្រុមឧទ្ទាមនិយម៕