កីឡា ៖ អតីតតារាបាល់ទាត់របស់ក្លិប Manchester United និងក្រុមជម្រើសជាតិអង់គ្លេស កីឡាករ Jesse Lingard បានធ្វើដំណើរមកកាន់លីគអាស៊ី ហើយបានលើកឡើងថា «លោកចង់រីករាយជាមួយនឹងការលេងបាល់ម្តងទៀត» បន្ទាប់ពីបានចុះកិច្ចសន្យាលេងឱ្យក្លិបកូរ៉េខាងត្បូង FC Seoul នៅថ្ងៃព្រហស្បតិ៍។
កីឡាករមានវ័យ ៣១ឆ្នាំរូបនេះ មិនមានក្លិបលេងនោះទេ ចាប់តាំងពីចាកចេញពីក្លិប Nottingham Forest ក្រោយពីចប់កិច្ចសន្យារបស់លោក កាលពីរដូវក្តៅមុន។ កីឡាករ Lingard ដែលបានចំណាយពេល ២២ឆ្នាំ លេងនៅក្លិប Man United មុនពេលចាកចេញពីកីឡដ្ឋាន Old Trafford កាលពីឆ្នាំ២០២២នោះ បានលើកឡើងថា «ការចូលរួមជាមួយក្លិប Seoul គឺជាការប្រកួតប្រជែងថ្មី ហើយលោកបានត្រៀមខ្លួនរួចរាល់ សម្រាប់ការទទួលយកវា»។
Lingard បានលេងត្រឹមតែ ២០លើកប៉ុណ្ណោះ នៅក្នុងការប្រកួតទាំងអស់ សម្រាប់ក្លិប Forest និងបានបង្ហាញខ្លួនត្រឹមតែ ៤លើកក្នុងឆ្នាំ២០២៣។ ក្លិប Seoul មិនបានបង្ហាញពីរយៈពេលនៃកិច្ចសន្យា របស់កីឡាករ Lingard នោះទេ ប៉ុន្តែប្រព័ន្ធផ្សព្វផ្សាយបានឱ្យដឹងថា វាមានរយៈពេល ២ឆ្នាំ៕