ក្លិបអ្នកកាសែតកម្ពុជា ( ក.អ.ក ) បានចេញនូវសារលិតខិតមួយ ដោយបង្ហាញនូវអារម្មណ៍ក្តុកក្តួល និងរន្ធត់ចិត្តជាពន់ពេក ក្រោយទទួលបានដំណឹងដ៏ក្រៀមក្រំថា លោក អ៊ុំ សារិន អតីតអ្នកកាសែតដ៏ល្បីឈ្មោះមួយរូបបានទទួលមរណភាពនៅថ្ងៃទី៩ ខែកុម្ភៈ ឆ្នាំ២០២៤ ក្នុងជន្មាយុ ៦៥ ឆ្នាំ ដោយរោគាពាធ។
តាមរយៈសារលិខិតនោះ ក.អ.ក បានលើកទ្បើងថា លោក អ៊ុំ សារិន គឺជាអ្នកសារព័ត៌មានដ៏មានបទពិសោធន៍ម្នាក់ និងបានចូលរួមចំណែកជាច្រើននៅក្នុងវិសយ័សារព័ត៌មាននៅកម្ពុជា ហើយក៏ជាឪពុក និងស្វាមីដ៏ល្អរបស់គ្រួសារផងដែរ។
ក.អ.ក ចាត់ទុកមរណភាពរបស់ លោក អ៊ុំ សារិន គឺជាការបាត់បង់ធនធានមនុស្សដ៏សំខាន់ម្នាក់នៅក្នុងវិសយ័សារព័ត៌មាន។ ទន្ទឹមនោះ ក.អ.ក សូមសម្តែងការសោកស្តាយចំពោះមរណភាពរបស់លោក និងសូមចូលរួមរំលែកទុក្ខយ៉ាងក្រៀមក្រំបំផុត ជាមួយក្រុមគ្រួសារនៃសពលោក អ៊ុំ សារិន ហើយក៏សូមបួងសួងឲ្យវិញ្ញាណក្ខន្ធរបស់លោកបានទៅកាន់សុគតិភព៕
