វ៉ាស៊ីនតោន៖ អគ្គលេខាធិការអង្គការណាតូ លោក Jens Stoltenberg បាននិយាយថា អង្គការណាតូ នឹងបង្កើតស្ថាប័នសម្របសម្រួលថ្មីមួយ ដើម្បីដោះស្រាយការគំរាមកំហែងដល់ហេដ្ឋារចនាសម្ព័ន្ធក្រោមសមុទ្រ។
ការប្រកាសរបស់លោក Stoltenberg ធ្វើឡើងប៉ុន្មានថ្ងៃ បន្ទាប់ពីអ្នករាយការណ៍ស៊ើបអង្កេតលោក Seymour Hersh បាននិយាយថា សហរដ្ឋអាមេរិក និងន័រវែស ជាអ្នកនៅពីក្រោយការបំផ្ទុះបំពង់បង្ហូរ Nord Stream នៅក្រោមសមុទ្របាល់ទិក កាលពីខែកញ្ញា។
លោក Stoltenberg បានប្រាប់អ្នកយកព័ត៌មាននៅទីក្រុង Brussels បន្ទាប់ពីកិច្ចប្រជុំរបស់រដ្ឋមន្ត្រីការពារជាតិណាតូថា ការការពារហេដ្ឋារចនាសម្ព័ន្ធក្រោមសមុទ្រដ៏សំខាន់ក៏នឹងមានកម្រិតខ្ពស់ផងដែរ នៅក្នុងរបៀបវារៈរបស់ប្លុក។
លោក បន្ថែមថា ប្លុកដែលដឹកនាំដោយសហរដ្ឋអាមេរិកនេះ ក៏បានធ្វើការលើបញ្ហានេះអស់រយៈពេលជាច្រើនឆ្នាំ ហើយឥឡូវនេះយើងកំពុងពិនិត្យវាបន្តទៀត៕
