អ៊ីរ៉ង់បានចេញមុខគំរាមថា អ៊ីស្រាអែលប្រឈមមុខនឹងសង្គ្រាមមហន្តរាយរលាយប្រទេសខ្លួនឯង ប្រសិនបើប្រើកម្លាំងចូលឈ្លានពានលីបង់។ អ៊ីរ៉ង់បានព្រមានបែបនោះ បន្ទាប់ពីមានការបាញ់ឆ្លងព្រំដែនកាន់តែខ្លាំងរវាង IDF និងក្រុមប្រដាប់អាវុធលីបង់ Hezbollah។
នាយករដ្ឋមន្ត្រីអ៊ីស្រាអែល លោក Benjamin Netanyahu បានថ្លែងកាលពីដើមខែនេះថា អ៊ីស្រាអែលបានត្រៀមខ្លួនរួចហើយសម្រាប់ប្រតិបត្តិទ្រង់ទ្រាយធំនៅតាមព្រំដែនជាមួយប្រទេសលីបង់។
នៅក្នុងការបង្ហោះនៅលើ X (អតីត Twitter) កាលពីថ្ងៃសុក្រ បេសកកម្មរបស់អ៊ីរ៉ង់នៅអង្គការសហប្រជាជាតិបានចាត់ទុកការត្រៀមលក្ខណៈជាក់ស្តែងរបស់អ៊ីស្រាអែលថា វាគ្រាន់តែជា សង្គ្រាមផ្លូវចិត្ត និងការឃោសនា។ ប៉ុន្តែបានព្រមានថា សង្គ្រាមនឹងកើតឡើង ប្រសិនបើអ៊ីស្រាអែលធ្វើការវាយប្រហារយ៉ាងពេញទំហឹងលើទឹកដីលីបង់ ហើយប្រាកដណាស់អ៊ីស្រាអែលនឹងរលាយ។
បេសកកម្មអ៊ីរ៉ង់បាននិយាយថា ជម្រើសទាំងអស់ រួមទាំងការចូលរួមពេញលេញនៃរណសិរ្សតស៊ូទាំងអស់ គឺស្ថិតនៅលើតុនៃសង្គ្រាមនោះ ហើយនឹងរួមគ្នាវាយបកទៅអ៊ីស្រាអែល។ លោកថា ដូចបានបញ្ជាក់ពីមុនហើយថា ហេសបូឡា មានសមត្ថភាពការពារខ្លួន រួមនឹងលីបង់ផងដែរ ហើយនឹងកម្ចាត់កងកម្លាំងការពារអ៊ីស្រាអែលមិនឲ្យងើបមុខរួច។
នៅព្រឹកថ្ងៃសៅរ៍ អ៊ីស្រាអែលបានវាយប្រហារទីតាំងជាច្រើននៅភាគខាងត្បូងប្រទេសលីបង់តាមបណ្តោយព្រុំដែន។ កងកម្លាំងអ៊ីស្រាអែល IDF បាននិយាយថា ក្នុងរយៈពេលប៉ុន្មានម៉ោងកន្លងទៅ យន្តហោះចម្បាំងបានវាយប្រហារគោលដៅ Hezbollah ជាច្រើន រួមទាំងទីតាំងយោធាសម្រាប់អង្គការនៅក្នុងតំបន់ Zabqin ទីតាំងហេដ្ឋារចនាសម្ព័ន្ធប្រតិបត្តិការពីរនៅក្នុងតំបន់ Khiam និងអគារ Hezbollah នៅក្នុងតំបន់ al-Adissa។
រដ្ឋមន្ត្រីការពារជាតិអ៊ីស្រាអែល លោក Yoav Gallant បានព្រមានកាលពីដើមសប្តាហ៍នេះថា ខណៈពេលដែលអ៊ីស្រាអែលមិនស្វែងរកសង្គ្រាមជាមួយប្រទេសជិតខាងរបស់ខ្លួននោះ យើងក៏កំពុងរៀបចំសម្រាប់គ្រប់សេណារីយ៉ូនៃសង្គាម ហើយអាចយកលីបង់ត្រឡប់ទៅយុគសម័យថ្មវិញ។ ប៉ុន្តែប្រធានក្រុម Hezbollah លោក Hassan Nasrallah បានឆ្លើយតបដោយនិយាយថា សង្គ្រាមដ៏មានសក្ដានុពលនឹងកើតមាន ដោយគ្មានការអត់ធ្មត់ និងគ្មានពិដានឡើយ។
អំពើហឹង្សាដែលបន្តកើតមានបានបង្កឱ្យមានការព្រួយបារម្ភជាថ្មីក្នុងចំណោមអ្នកនយោបាយលោកខាងលិច និងក្រុមសង្គ្រោះ ដោយប្រធានកិច្ចការមនុស្សធម៌របស់អង្គការសហប្រជាជាតិ Martin Griffiths បានព្រមានថា អនាគតនៃការផ្ទុះសង្គ្រាមរវាងអ៊ីស្រាអែល និងលីបង់គឺមានច្រើន៕
