មូស្គូ៖ អតីតប្រធានាធិបតីរុស្ស៊ី លោក Dmitry Medvedev បាននិយាយថា ការប៉ុនប៉ងរបស់បស្ចិមលោក ក្នុងការដាក់ទណ្ឌកម្មលើមហាអំណាចនុយក្លេអ៊ែរ ដូចជារុស្ស៊ី ក្រោយផ្ទុះសង្គ្រាមជាមួយអ៊ុយក្រែន នឹងបង្កជាគ្រោះថ្នាក់ដល់មនុស្សជាតិ។
ការឈ្លានពានរបស់រុស្ស៊ី នៅថ្ងៃទី ២៤ ខែកុម្ភៈ លើទឹកដីអ៊ុយក្រែន បានបង្កឱ្យមានវិបត្តិធ្ងន់ធ្ងរបំផុតនៅក្នុងទំនាក់ទំនងរវាងទីក្រុងមូស្គូ និងលោកខាងលិច ចាប់តាំងពីវិបត្តិមីស៊ីលគុយបាឆ្នាំ ១៩៦២ នៅពេលដែលមនុស្សជាច្រើនភ័យខ្លាចថាពិភពលោក កំពុងស្ថិតក្នុងបន្ទាត់នៃសង្គ្រាមនុយក្លេអ៊ែរ។
ទន្ទឹមនោះ កន្លងមក ប្រធានាធិបតីអាមេរិក លោក Joe Biden បានចោទលោក Vladimir Putin ថាគឺជាឧក្រិដ្ឋជនសង្គ្រាម ហើយលោក ក៏បានដឹកនាំប្រទេសលោកខាងលិច ក្នុងការបំពាក់អាវុធដល់អ៊ុយក្រែន និងដាក់ទណ្ឌកម្មយ៉ាងធ្ងន់ធ្ងរលើប្រទេសរុស្ស៊ី។
លោក Medvedev ដែលឥឡូវជាអនុប្រធានក្រុមប្រឹក្សាសន្តិសុខរុស្ស៊ី បាននិយាយ នៅលើ Telegram កាលពីថ្ងៃពុធថា គំនិតនៃការដាក់ទណ្ឌកម្មប្រទេសដែលមានសក្តានុពលនុយក្លេអ៊ែរដ៏ធំបំផុតដូចតុស្ស៊ី នេះគឺមិនសមហេតុសមផលនោះទេ។
គួរបញ្ជាក់ថា យោងតាមសហព័ន្ធអ្នកវិទ្យាសាស្ត្រអាមេរិក បានឱ្យដឹងថា ប្រទេសរុស្ស៊ី និងសហរដ្ឋអាមេរិក គឺគ្រប់គ្រងប្រហែល ៩០ ភាគរយនៃក្បាលគ្រាប់នុយក្លេអ៊ែររបស់ពិភពលោក ជាមួយនឹងក្បាលគ្រាប់ប្រហែល ៤,០០០ គ្រាប់ នៅក្នុងឃ្លាំងយោធារបស់ពួកគេ៕
រក្សាសិទ្ធិដោយ៖ ភ្នំពេញថ្មី
